Desta volta imos falar de madridistas con pasado branquiazul. A evolución do mundo do fútbol fixo que cada vez se dean menos historias de mulleres e homes que so vestiron a elástica dun club. As e os chamados one club women / men. Xustamente nesta reportaxe imos falar de xogadoras que teñen vestido, canda menos, dúas camisetas en concreto. Unha delas é galega e branquiazul, a do RC Deportivo ABANCA. A outra, é merengue, a do Real Madrid. Neste momento hai tres futbolistas que cumpre ese requisito en activo: Misa, Athenea del Castillo e Tere Abelleira, as tres no club branco.
Este trío de deportistas está conformado por unha canaria, unha cántabra e unha galega que noutra hora defenderon as cores do Dépor ABANCA e que nesta tempada militan na Primera Iberdrola nas filas do Real Madrid. Elas son tres madridistas que foron deportivistas.
Tere Abelleira (Pontevedra, 2000)
Para moitos Tere Abelleira é a substituta natural de Vero Boquete no fútbol feminino galego. A centrocampista pontevedresa conta cunha visión de xogo que a fai especial sobre o tepe. Chegou ao RC Deportivo no ano 2016, cando Manu Sánchez adestraba o Dépor ABANCA na categoría de prata.
Tere Abelleira pasará á historia do futfem galego por ser, coa pontesa Raquel Béjar, a primeira xogadora en ter contrato profesional no fútbol feminino galego.
Tras catro tempadas defendendo a elástica do Dépor ABANCA, co que ascendeu á elite e sorprendou liderando o centro do campo do club revelación, Tere Abelleira ficha polo Real Madrid no 2020, con 20 anos.
A futbolista galega debutou coa Selección Española absoluta en novembro de 2020 ante Moldavia.
Misa Rodríguez (Las Palmas de Gran Canaria, 1999)
María Isabel Misa Rodríguez, defendeu a portaría do Dépor ABANCA na tempada 2019-20. Antes xa militara no CD Femarguín da súa illa natal, e no Atlético de Madrid. Do club branquiazul deu o salto á casa branca, onde milita desde o curso 2020-21. Foi outra das deportistas que chamaron a atención naquela máxica tempada debut do Dépor ABANCA na Primera Iberdrola.
Misa compartía posto baixo paus con Esther Sullastres coa que se alternaba na portaría. Como porteira a deportista grancanaria conta con cualidades moi interesantes como a súa boa colocación e reflexos.
Misa Rodríguez debutaba como internacional coa Selección Española absoluta de fútbol feminino en partido oficial en febreiro de 2021.
Athenea del Castillo (Solares, 2000)
A cántabra Athenea del Castillo chegaba a Galicia para engrosar as filas deportivistas na campaña 2019-20 procedente do Rácing Féminas. Antes tiña militado no AVE Fénix Rácing. A súa fichaxe trouxo certa polémica pola negativa do Rácing a deixar ir á futbolista. Ao final, o club de Santader cedeu e todo que dou en nada.
Desde entón, a deportista de Solares estivo regalando goles desde o seu posto de interior dereito atacante á afección deportivista ata o curso 2020-21. Foi nesta tempada 2021-22 cando fichou polo Real Madrid CF, seguindo así os pasos dados previamente por Tere Abelleira e Misa Rodríguez.
O descenso do club branquiazul á Reto Iberdrola logo de loita ata o último momento pola permanencia, e a proxección internacional da futbolista facíanse incompatibles. Así que Athenea puxo rumbo á casa branca.
Rápida, veloz e con gol, Athenea del Castillo, xunto con Peke e Tere Abelleira, conformou un triunvirato épico naquel Dépor ABANCA da liga 2019-20 que fixo historia como equipo revelación na máxima categoría. Foi chegar e encher. Pero aquel éxito suporía tamén a condena para o futuro do club, xa que outros equipos, como o caso do Real Madrid CF, acudiron a pescar xogadoras a augas galegas e a entidade branquiazul, máis modesta e con moito menos orzamento, foi perdendo efectivos.
Pagouno caro o seguinte curso, no que remataría por descender á categoría de prata do fútbol feminino español, a Reto Iberdrola onde milita actualmente baixo a dirección do técnico Miguel Llorente. O adestrador, procedente do FC Barcelona, substituiu a Manu Sánchez logo do descenso das coruñesas.
Aquela tempada 2019-20 o xogo de Athena del Castillo levouna a ser distinguida non so nas crónicas, se non tamén con premios como o Fútbol Draft de Ouro 2019-2020 como a mellor interior dereita.
Como as outras tres futbolistas madridistas – deportivistas das que falamos desta volta, a cántabra tamén acadou a internacionalidade absoluta coa Roja. Foi En outubro de 2020 cando defendía aínda a camiseta branquiazul do club herculino.
A lista de homes inclúe a deportivistas – madridistas como Amancio ou Buyo
Se facemos un repaso pola listas de futbolististas homes que teñen xogado no Real Madrid e no RC Deportivo da Coruña atopamos nomes históricos tanto do club branco como do deportivista. Na lista están nomes como o de Amancio Amaro, todo un nome propio do fútbol coruñés, galego e español.
Hai históricos do Dépor como Pahiño, futbolista vigués que tamén xogou no equipo da súa cidade, o Real Club Celta de Vigo. Manuel Fernández Fernández, Pahiño, chegaría a ser máximo goleador no conxunto madrileño. Foi pichichi co Celta na 1947-48 e como madridista na 1951-52. Contan as hemerotecas que lle chamaban o fútbolista rojo, por que gostaba de ler a Tolstoi e a Dostoievski. Na web deportivista www.rcdeportivo.com explicase no apartado reservado a plantillas históricas, que na tempada 1955-56, Pahiño chegou a ser xogador e adestrador un mes, deulle tempo tamén a marcar 14 goles. Foi precisamente ese ano cando o Dépor gañaba por vez primeira ao Real Madrid no Santiago Bernabéu (1-2), como recolle a web deportivista.
Non esquezamos nesta relación de deportistas a xogadores que marcaron unha época nas filas branquiazuis e que foron tamén madridistas como Aldana, Martín Vázquez, Flávio Conceiçao ou Víctor Sánchez del Amo, quen co paso do tempo incluso chegou a adestrar aos coruñeses.
Nesa lista de nomes propios de xogadores deportistas e madridistas están amén: Amavisca, Álvaro Arbeloa, Fede Valverde, Filipe Luis, Jaime, Joselu, José Rodríguez, Juanfran, Mista, Mosquera, Munitis, Riki, Rafael Martín Vázquez, Villarroya e o mítico cancerbeiro betanceiro Paco Buyo.
