O CV Arenal Emevé non chegou á final da Liga Iberdrola. Porén, este partido si contou con presenza galega. Helia González, Lucía Varela e María Álvarez competiron no duelo polo título, estando as dúas primeiras nas filas do CV CCO 7 Palmas e a terceira no Feel Volley Alcobendas. O campionato foi finalmente para as canarias, tras vencer no set de ouro, o primeiro do voleibol español.
Nos setes iniciais, María Álvarez estivo na pista no bando das madrileñas desde o primeiro minuto, así como Varela e González, no que remataría por ser o equipo gañador. As locais saíron máis forte ao inicio do encontro, pero as canarias responderon no segundo set grazas ao xogo de Helia González e a súa compañeira Victoria Foucher, fundamentais nos ataques.
Co paso dos minutos, o partido seguía moi igualado, pero tras disputar catro sets o marcador informaba do 3-1. Con este resultado, foi necesario un set de ouro para decidir ao club merecedor do título de campión. Con toda a Liga en xogo, Alcobendas e CV CCO 7 Palmas déronno todo coas galegas na pista, para rematar nun axustado 13-15 a favor das canarias.
Os números das galegas na final
Como local, María Álvarez sumou un total de 3 puntos e participou en 16 saques do seu equipo. Na previa, a galega partía como a mellor sacadora do seu equipo, cunha media de 0.8 aces por partido. No bando rival, a súa homóloga era a tamén galega Lucía Varela, con 54 aces anotados na competición regular e unha media de 1,7. Na final, Varela sumou 9 puntos para as canarias.
No mesmo equipo, Helia González partía como a mellor atacante, cunha eficiencia do 26% e unha eficacia do 39%. Neste duelo final, a galega mellorou as súas cifras, ata o 52% na primeira e o 32% na segunda.
