O cros galego dáse cita esta fin de semana no municipio ourensán de A Rúa. Alí terán lugar tres citas de campo a través: o XXIV Memorial Alejandro Lorenzo, o XLVIII Campionato de Galicia Sub18 H – XL Sub18 M – XIV Sub16 de campo a través individual e de clubs e o Campionato de relevos mixto.
Agárdase unha xornada de campo a través chea de emoción e moi intensa. Concorrerán máis dun milleiro de persoas entre atletas e seareiros/as do cros no Circuíto de O Aguillón, na Rúa. O percorrido será espectacular e perfectamente visible dende tódolos puntos de O Aguillón.
XXIV Memorial Alejandro Lorenzo de campo a través
Son xa 24 edicións do Memorial Alejandro Lorenzo, unha competición que está considerada un clásico das categorías menores de campo a través en Galicia. A cita está previsto que arranque contra as 10:30 horas do domingo 26 de xaneiro e será a que abra a programación competitiva en terras da Rúa. Espéranse 425 atletas chegados de toda a comunidade autónoma galega.
Agárdase unha proba de atletismo moi aberta e competida. Con todo, Ainara Fernández e Caterina Vázquez, do Atletismo Noia, son as favoritas nas quinielas xunto coa corredora do Vila de Cangas, Maialen Fernández.
Entre as Sub 12, con 140 atletas participando, apunten os nomes de Sabela Castelo do Vila de Cangas, Carmen Paz do Noia e Lidia Balseiro do Maderas Barcia Lourenzá.
As/os pícaros/as de Sub 10, categoría na que hai 90 deportistas anotadas, pecharán este Memorial de cros. Desde a Federación Galega de Atletismo apuntan na súa previa que entre os aspirantes á vitoria na Rúa están: José Hervella do ADAS Proinor e a noiense Carmen Paz.
Haberá que estar pendentes das evolucións no Sub 14 masculino de Damián Suárez do C.N.Cedeira, Daniel Salgueiro do Coruña Comarca e Alex Sierpes do Trega, garantizarán unha fermosa e disputada proba. E nos Sub 12 masculino, destacan os atletas Hugo Collazo do Vila de Cangas, Juan Loureiro de A Silva e Mateo Valcarce do ADAS Proinor.
Campionato de Galicia Sub 16 e Sub 18
Polo que atinxe ao Campionato de Galicia Sub 18, a cita contará con Carla Guisande do Beade tentando defender o seu título. O pasado curso foi a triunfadora neste mesmo escenario. Enfronte, como principal competidora, todo indica que estará a súa compañeira de club, Aldara Fonseca.
No galego Sub 16 os prognósticos dan como favorita á corredora da Estrada Laura Carracedo, pero tamén soan como aspirantes ao podio as atletas Xela Martínez e Sara Guedes, que militan na Atlética Lucense. Con elas nas súas filas, este club de Lugo convértese nun serio aspirante ó título galego por equipos nesta categoría. Ollo tamén ás evolucións de corredoras como Ánxela Seoane do Ourense Atletismo.
Dentro da competición masculina, na categoría Sub18, un dos principais favoritos para o título será o céltico Hugo García quen o ano pasado acadaría o segundo lugar tras El Medih El Nabaoui que este ano xa é Sub20. Con el presumiblemente estarán na loita polos postos de podio os atletas da Atlética Lucense Iker González e Carlos López así como Pedro Vázquez do Celta.
Na categoría Sub16 masculina os nomes propios sobre o papel deberan ser Héctor Rodríguez do C.D. Aurium, Teshome Hermida do Franciscanos e Cosme Viaña da Atlética Lucense.
II Campionato de Relevos Mixtos de cros
Contra o final da mañá, en principio para as 13:45 horas, está prevista a saída da segunda edición do Campionato de Relevos Mixtos. Serán 13 os equipos que compitan.
Na Rúa estarán as anfitroas do ADAS Proinor, que contan cun potente equipo formado por Marta Casanova, Ivan Roade, Sandra Mosquera e Luis Pérez. En principio, son serias aspirantes ao manter o título que acadaron o ano pasado. Entre os seus rivais estarán clubs como o Gimnástica de Pontevedra e o LUCUS Caixa Rural Galega.
