A Liga Galega de Traiñeiras Trofeo Xunta de Galicia pechou a tempada 2023 este domingo en Ares, coa traiñeira de Chapela Wofco como campioa, logo dunha tempada intratable, pero o remo quedou nun segundo plano porque os actos principais da xornada estiveron destinados a homenaxear a Adrián Neo, o patrón de Rianxo falecido nun accidente con tan só 12 anos. Quedará para o recordo de todos os presentes en Ares, o minuto de silencio realizado no peirao coas 25 traiñeiras da liga coas palas en alto no mar.
A homenaxe tivo lugar trala disputa da liga feminina, aínda que a competición abriuse coa segunda xornada do play-off. Unha quenda contra reloxo para disputarse unha praza na liga A 2024.
As traiñeiras saíron por orde inversa a clasificación con Amegrove primeira seguida de Puebla, Mugardos A Cabana e Samertolameu Fandicosta.
O campión do día anterior daba emoción á competición, xa que saíu sen rabiza o que lle suporía unha sanción de 10 segundos. Coa competición en marcha, os de Meira marcaron o mesmo tempo que Puebla na primeira virada, con Mugardos A Cabana Ferrol terceira e Amegrove cuarta.
Na segunda virada Puebla poñíase por diante a tan só un segundo de Samertolameu Fandicosta e facía o mesmo na última virada, con Mugardos A Cabana aguantando terceira a escasos segundos, co que a sanción de Meira abría a posibilidade dun empate entre os tres equipos. Suposición que non se deu porque no último longo Samertolameu Fandicosta superou o tempo dos seus rivais e parou o cronómetro dous segundos por diante de Puebla, iso si, coa sanción caía a 8 por detrás. Tempo final co que superaba a Mugardos A Cabana de Ferrol e certificaba a vitoria no play-off dos de Meira. Segundo foi Puebla que terá que agardar acontecementos favorables para poder manterse na liga A.
Chapela Wofco pechou a competición sen dar opcións ás rivais unha xeira máis
Tralo play-off comezou a categoría feminina en dúas quendas lanzadas. A I Bandeira Feminina Concello de Ares foi unha homenaxe, así mesmas, das remeiras de Chapela Wofco, xa que volveron realizar unha regata na que non deron opción as súas rivais.
Durante toda a campaña a tripulación de Chapela Wofco estivo intratable e na última cita, non había ser menos.
As da Arealonga competiron quenda con Rianxo e Mugardos A Cabana de Ferrol. Cun punto de diferencia na clasificación xeral, a proba decidiría quen remataba finalmente en segunda posición. Así que ambas traiñeiras saíron a por todas para conseguir esa posición. Loita que se viu reflexada na primeira virada, coas dúas xirando no mesmo tempo. Dous segundos de diferencia na segunda virada a favor das ferroláns e a partir de aí, a embarcación do norte abriu oco e sentenciou a loita coas do Barbanza. 11 segundos na terceira virada e 15 no tempo final, segunda posición para Mugardos A Cabana de Ferrol, terceiras as de Rianxo.
Nesa quenda tamén competía Cesantes Cefycal que quedou lonxe das outras traiñeiras pero que loitaba contra o crono de Salgado Perillo na quenda anterior, xa que ambas, aínda que en diferentes mangas, calcaban os tempos ao longo das viradas. Finalmente as de Redondela superaron ás de Oleiros. Na primeira quenda, a loita por detrás estivo entre Castropol e Puebla, aínda que a igualdade durou pouco, xa que as asturianas sentenciaron a partir do terceiro longo.
O dominio nesta tempada da tripulación da traineira de Chapela Wofco foi rotundo.
Homenaxe a Adrián Neo coas palas en alto e un minuto de silencio
Trala categoría feminina tivo lugar a homenaxe a Adrián Neo Romero. Coa súa familia no palco, as 25 traiñeiras levantaron as súas palas durante un minuto de silencio, ao que moitos responderon tamén con aplausos para o patrón de Rianxo. Ao rematar, as súas compañeiras de tripulación lanzaron dúas rosas ao mar na súa honra.
Trala homenaxe, pecharon a tempada as tripulacións da liga A. Dúas quendas lanzadas e unha final en solitario para decidir quen gañaba a XVI Bandeira Concello de Ares. A vantaxe a tiñan os locais cos dous segundos cos que superaron a Bueu Simei o día anterior, pero os da Maruxía quería levarse a última alegría da tempada.
As ganas de ambos equipos por facerse coa bandeira viuse dende as primeiras padas. Saíron cun ritmo tan alto que es afastaron rapidamente de Tirán Pereira e de Castropol e chegaron á primeira virada superando con claridade a Chapela Wofco, gañadora das quendas lanzadas. Ambas traiñeiras chegaron á primeira virada á par.
Na segunda Ares parecía sentenciar poñéndose un segundo por diante de Bueu Simei pero a Maruxía deu a volta a situación no terceiro longo e virou 4 segundos por diante da Santa Olalla. Os locais apertaron todo o que puideron para repetir a machada do día anterior cunha nova remontada pero os de Bueu Simei tiñan a lección ben aprendida e defenderon a posición, ampliando incluso a súa vantaxe e superando a Ares por cinco segundos. Xornada e bandeira, pola suma de tempos dos dous días, para Bueu Simei.
Xunto con Ares e Bueu Simei partiron Tirán Pereira e Castropol. Os asturianos comezaron por diante pero a diferencia do día anterior, este domingo no perderon a posición, aguantaron a Tirán Pereira e conseguir pechar terceiros a quenda. Aínda así, o tempo de Castropol foi pero que o de Chapela Wofco que superou con contundencia aos rivais da súa manga, Rianxo e Cabo.
As dúas embarcacións do Barbanza, como foi habitual durante toda a tempada, víronse as caras na mesma manga e volveron a loitar man a man ata o final. De feito na segunda e na terceira virada marcaron o mesmo tempo. Finalmente a vitoria foi para a embarcación de Cabo da Cruz. Ambas superaron con claridade a Mecos que liderou a primeira manga con moito marxe.
Os seus rivais era Cesantes Rodavigo e Narón. Dúas traiñeiras que estiveron igualadas ao longo da tempada pero non na xornada deste domingo. Onde os de Redondela superaron con claridade aos de Narón.
Adrián Neo, mellor patrón da Liga Feminina
Trala disputa da competición, tivo lugar o acto de clausura da Liga Galega de Traiñeiras Trofeo Xunta de Galicia. Onde se entregaron as medallas aos tres primeiros clasificados de cada liga e as bandeiras aos campións: Muros Esteirana, Ares e Chapela Wofco.
Tamén se entregaron aos premios aos mellores patróns: Julia Devesa na liga B, Andrés Ríos na liga A e Adrián Neo na liga feminina. O seu irmán Nazario Neo entre a emoción e os aplausos, recolleu o premio.
