A ciclista sub-23 Irene Trabazo (XSM) impúxose na última proba puntuable para a Copa Galicia, o XII Ciclocros de Maceda. As mellores especialistas desta modalidade deportiva sobre dúas rodas brillaron o domingo neste test previo ao Campionato de España que terá lugar a vindeira fin de semana en Pontevedra.
Trabazo foi a incuestionable gañadora na categoría elite e sub-23 tivo. Co punto de forma que lle outorgou a súa xira de Nadal por Bélxica e Francia, a marinense do XSM ergueu os brazos ao cruzar a liña de meta cun tempo de 42:51, superando en tres minutos e medio á tamén sub-23 Carla Fernández (Río Miera). A terceira muller máis rápida foi a júnior Noela Saa (Maceda).
O cadro de gañadoras da duodécima edición do Ciclocrós Castelo de Maceda completárono Uxía Soto (Avanza) en cadetes, María Jesús Barros (Spol) nas elites, Rocío Blanco (A Forna) en máster-30, Natalia Raña (Corbelo) en máster-40 e Isabel Castro (Condado Bike) en máster-50.
Cambre, mellor equipo da Copa Galicia
A Copa Galicia pechouse coroando ao Cambre como mellor equipo desta edición e coa entrega de premios aos tres primeiros nos ránkings finais de cada categoría. Nas clasificacións que aínda non estaban sentenciadas matematicamente conservaron a primeira posición Laura Capa (Aleata-Farto) nas juniors, Diana Blanco (Barbanzabike) nas elites e Natalia Raña nas máster-40/50.
O resto de gañadoras do certame autonómico foron Laura Mira (Redondela) nas cadetes, Carla Fernández (Río Miera) nas sub-23, Rocío Blanco nas máster-30.
