O CICAR Lanzarote Ciudad de Arrecife caía no seu feudo 20-26 co Club Balonmán Atlético Guardés. Ás galegas custoulles acadar este triunfo na cancha do tradicionamente coñecido como BM San José Obrero. Logo deste resultado, as galegas ocupan a terceira praza nesta primeira fase da competición dentro do Grupo A, mentres que as lanzaroteñas son sextas nun total de oito equipos.
O resultado engaña. Esta vitoria do Guardés acadada por un marcador final 20-26 en Lanzarote custou un mundo. Esa renda de seis goles pouco fai intuír o esforzo e traballo do equipo de José Ignacio Prades para sentirse cómodo na pista e sobreporse a unha desvantaxe mínima ao descanso (12-11) pero que non deixaba bo corpo ás galegas antes do paso por vestiarios.
Míriam Sempere estaba atinada baixo paus, Gabriela Pessoa (con seis tantos en trinta minutos) era incontrolable. Baixo a batuta de Patrícia Lima o Guardés gozou dos seus mellores minutos no segundo acto e o tempo morto do técnico guardés ao fío do minuto 45 resultou clave antes do parcial de 0-3 que permitiu respirar tranquilo ao equipo (16-21) até os minutos finais.
O Guardés, que non puido contar finalmente para este cruce coa capitá África Sempere por motivos persoais, iniciou o partido buscando recuperar o ritmo competitivo que onte na previa xa advertiu Prades tentouse manter nas últimas semanas sen disputar partidos.
Amosábase Míriam Sempere con confianza baixo paus, pero o Atlético Guardés estaba errático en ataque e era incapaz de controlar a Pessoa.
Foi unha primeira parte de alternativas, con moita igualdade reflectida no marcador e que deixou tímidas vantaxes para as da Guarda (1-3, 2-4, 7-9, 8-10) ata que un só gol no últimos cinco minutos puxo as cousas de cara para as de Betancort (12-11).
Tras o paso por vestiarios, o equipo de Prades mostrouse aos poucos máis confiado, máis seguro baixo a dirección de Lima que atopaba boas conexións con pivote e circulaba o balón e con máis consistencia en defensa con Gómez – Descalzo, etc. e protexido baixo paus cunha notable Marisol Carratú.
Con esta fórmula e un par de axustes, o Guardés gozou dos seus mellores minutos con Paulina Pérez (11) e Sandra Santiago (6) como referentes ofensivos.
Chegábase ao final do partido cun resultado de 20 a 26. As locais, do CICAR Lanzarote Ciudad de Arrecife marchaban á ducha coa sensación de estar traballando na boa liña para seguir medrando como equipo na máxima categoría do balonmán feminino español.
Fin da primeira volta co Guardés loitando pola segunda praza
A vindeira semana conclúe a primeira volta neste grupo. As canarias do BM San José Obrero visitarán o sábado ao CB Lanzarote Puerto del Carmen. Polo tanto vivirase un duelo insular en toda regra.
No caso das galegas, tócalles recibir na casa ao Rincón Fertilidad Málaga polo que a segunda praza estará en xogo. As andaluzas ocupan agora ese posto ao que aspiran as da Guarda que farán valer o Inferno da Sangriña para subir postos na táboa clasificatoria nesta primeira etapa competitiva.
FICHA TÉCNICA
20) SAN JOSÉ OBRERO LANZAROTE (12+8): Esther Cabrera, Melania Cabrera (2), Nabila Harchaquin (2), Nagore Saenz (2), Sara de León (1), Alicia Torres (3), Gema Trujillo (3), Aleksandra Orowicz, Aizaya Tarin, Gabriela Romero (1), Gabriela Pessoa (8), Orbelinda Curbelo, Priscila dos Santos, Ana Marín e Miriam Paez.
26) CLUB BALONMÁN ALTÉTICO GUARDÉS (11+15): Sandra Santiago (6), Lorena Pérez (1), Estefanía Descalzo (2), Miriam Sempere, Paulina Pérez (11), Patrícia Lima (2) , Cristina Barbosa, Paula Arcos (2), Carla Gómez, Marisol Carratú, Erika Rajnohová, Laura Morais e Daniela Moreno (2).
RESULTADO CADA 5 MIN.: 1-3, 4-4, 4-5, 7-7, 10-10, 12-11 (descanso), 12-12, 14-16, 16-18, 16-21, 18-22, 20-26 (final).
ÁRBITROS: Víctor Navarro Baquero e Fernanda Espino Guerra (Canarias). Excluíron por parte das locais a Harchaouin, Saenz, Torres e Pessoa e do equipo visitante a Pérez e Buforn.
INCIDENCIAS: Partido correspondente á Xornada 6ª do Grupo A da Liga Guerreras Iberdrola disputado no Pavillón Municipal Titerroy a porta pechada.
