- Chegou o día da X Carreira Popular Torre de Hércules e da Andaina Solidaria #ImportaEMoito que ten máis de 2.400 persoas inscritas.
- O faro romano iluminarase de lila nesta data.
- Está previsto un servizo de atención á infancia, tamén haberá guardaroupa e vestiarios.
As máis de 2.400 persoas inscritas que se darán cita hoxe, sábado 26 de marzo, na celebración da que será a segunda proba do circuíto Coruña Corre contarán, como en pasadas competicións, con servizos complementarios nun trazado preparado para o bo desenvolvemento da proba.
A organización da X Carreira Popular Torre de Hércules, Trofeo José Antonio Varela Calviño, e a andaina solidaria #ImportaEMoito prevé que corredoras poderán recoller os seus respectivos dorsais na aula habilitada para o efecto na Cidade Deportiva da Torre Arsenio Igrexas, desde as 10.00 horas ata media hora antes do comezo de cada unha das carreiras.
Ver esta publicación en Instagram
Aqueles atletas que xa están inscritos no circuíto Coruña Corre, e que participaron na proba de Matogrande, contan xa cun dorsal que é válido para todo o circuíto.
Do mesmo xeito que na popular de Matogrande, e atendendo á demanda dos corredores e corredoras, volverá estar habilitado un servizo de gardarroupa do que dispoñerán no propio frontón de 19:00 a 21:15 horas.
Todos os atletas da categoría absoluta terán á súa disposición os vestiarios da Cidade Deportiva da Torre Arsenio Igrexas a partir das 19:30 horas.
A entrega de trofeos, que terá lugar no frontón da Torre, realizarase para as carreiras de menores ás 19:10 horas e ás 21:15 a entrega da carreira absoluta. Recoméndase aos corredores premiados que se sitúen na zona próxima ao palco de entrega.
Ver esta publicación en Instagram
Tras a carreira e o esforzo, a través do escaneado do código QR que posúen todos os dorsais, poderase acceder aos tempos oficiais. Tamén estará dispoñible o vídeo que rexistra a chegada de cada atleta. Coruña Corre está tamén na Popular Torre de Hércules ao servizo dos seus auténticos protagonistas, as/os atletas participantes nesta cita deportiva coruñesa.
Servizo de atención á infancia na Popular da Torre
Este ano, o Concello da Coruña, buscando impulsar a conciliación entre familia e actividade deportiva ofrece en todas as carreiras do circuíto un servizo de atención á infancia para os fillos e fillas dos corredores e corredoras, vaian ou non a competir nas carreiras de menores.
A gran inscrición tanto na carreira absoluta como nas carreiras dos atletas de menor idade, con máis de 300 corredores e corredoras na categoría Peques, levou á organización para adoptar medidas de conciliación para os participantes.
Segundo informan desde o Concello da Coruña “para a atención aos máis novos contarase con persoas monitoras, tituladas en tempo libre, en número necesario para garantir unha cociente de 10 nenos/as por cada persoa monitora. Por esta razón faise necesario coñecer previamente o número de solicitudes. Para iso enviouse unha comunicación desde a organización. Recibíronse 25 solicitudes de persoas que farán uso deste servizo”.
As nenas e nenos poderán gozar da ludoteca en horario de 19:00 a 21:30 horas no frontón da Cidade Deportiva da Torre Arsenio Igrexas. Haberá listaxes dos mesmos e todos estarán perfectamente identificados. Así mesmo, implantaranse as medidas sanitarias necesarias para garantir a seguridade nas actividades lúdicas para os máis pequenos.
Así afectará ao tráfico da Coruña a Carreira da Torre e a Andaina
O Concello da Coruña informa tamén dun dispositivo de tráfico e protocolo Covid para a Carreira a Torre e a Andaina #IMPORTAEMOITO. Así, desde as 19.30 ás 21.00 horas de hoxe, sábado 26 de marzo, pecharase ao tráfico o tramo do Paseo Marítimo desde a Glorieta de Adormideras ata as Ánimas.
Explican desde o Concello que con motivo da X Carreira popular Torre de Hércules “Trofeo José Antonio Varela Calviño” e a II Andaina Solidaria #ImportaEMoito implementarase un dispositivo de tráfico na contorna da Torre de Hércules.
Estas son as afeccións:
- Barrio de Durmideiras
- De 20 A 20.15 h. Corte Total de acceso ao barrio desde o Paseo Marítimo.
- De 20.15 a 21.00 h. dáse acceso ao barrio desde o Paseo Marítimo con Tráfico Alternativo por un carril regulado pola Policía Local.
- De 19.30 a 21.00 h., Corte Total das Rúas Manuel García Canzobre e Veramar.
- Os tramos do Paseo Marítimo, afectados son os seguintes:
- De 20 a 20.15 h. Corte Total da C/ Doutor Vazquez Igrexas, para celebración da Andaina.
- De 20 a 20.15 h. Corte Parcial da calzada sentido Adormideras / Torre de Hércules, manténdose a conexión coa Avda. de Navarra, para celebración da Andaina.
- De 19.30 a 21.00 h. Peche Total do Paseo Marítimo AMBOS OS sentidos, desde a Glorieta de Adormideras ata Ánimas, manténdose un carril de conexión desde Xullo Portela Ceballos (Hípica) ata Ánimas e pechándose o acceso cara ao Oceanográfico.
As carreiras de menores desta segunda proba do Circuíto Coruña Corre 2022 non afectarán o tráfico rodado xa que se celebrarán no Paseo dos Menhires, onde se suprimirá o estacionamento.
A proba non afectará o tráfico na propia Praza de Ánimas, xa que as persoas participantes na competición darán volta no paso de peóns previo.
A carreira conta cun protocolo de prevención da COVID-19
Como non podería ser doutro xeito, a X Carreira popular Torre de Hércules conta cun protocolo de prevención da transmisión da COVID-19. Inicialmente, aplicarase, tanto para as carreiras como para a andaina, o protocolo da Federación Galega de Atletismo que rexe desde o pasado 10 de marzo, aínda que podería haber novidades no caso de que se publique unha nova actualización.
Deste xeito, só será obrigatoria a máscara na saída e primeiros metros da proba así como na chegada a meta. Á hora de retirar os dorsais, non será preciso presentar certificado de vacinación, nin test de antígenos, nin certificado médico conforme superouse a infección por COVID-19. As saídas efectuaranse en quendas de 500 persoas.
Os dorsais están dispoñibles na aula que se habilitou para ese efecto na Cidade Deportiva da Torre-Arsenio Igrexas este venres 25 de marzo de 17:00 horas a 21:30 horas e o día da carreira desde as 10:00 horas ata media hora antes do comezo de cada unha das probas da competición.
No caso da Andaina, os dorsais estarán dispoñibles o sábado desde as 10:00 horas ata as 20:00 horas e as persoas que desexen inscribirse poden facelo e/ou efectuar donativos durante a recollida de dorsais.
