Prata para Nerea Pampín e bronce para Lydia Pérez foron os resultados do torneo internacional de Klippan, en Suecia. Na cita só participaron as deportistas da Selección Española: Lydia Pérez e Nerea Pampín, ambas as dúas galegas. As loitadoras de Galicia foron acompañadas do técnico Rubén Méndez, segundo informa a Federación Galega de Loita (FEGALOITA).
Nerea Pampín cae na final co Elleni Diacoumas Johnson
Grata sorpresa a que deu a loitadora galega Nerea Pampín -65 kg (Club de Loita Keltoi de Vila de Cruces), vencendo en primeira rolda á campioa sueca, Nora Svensson. En semifinais tivo un complicado cruce contra a noreguesa Ingrid Skard, que venceu aos puntos para meterse de cheo na final. Nerea Pampín caeu na final da categoría por un apretado 4 – 5 contra, Elleni Diacoumas Johnson (USA).
Na categoría de -62kg, Lydia Pérez (Club de Loita Pontevedra) logrou unha meritoria medalla de Bronce. Tivo unha competición moi sólida, derrotando en primera rolda á campioa francesa, Iris Thiebaux vencendo aos puntos. Nas semifinais Lydia Pérez Touriño caía derrotada diante da campioa do mundo, Suzu Sasaki (JAP). Máis tarde vencería por superioridade técnica na loita polo bronce á representante de USA, Ella Schmit.
O técnico Rubén Méndez, amosouse contento polo desempeño de ambas as dúas deportistas galegas, que agora permanecerán concentradas en Klippan, durante cinco días, antes de volver aos adestramentos do CGTD de Pontevedra e unha semana porán rumbo cara á concentración internacional no INSEP de París. No longo prazo a meta son, precisamente os Xogos Olímpicos que se disputarán en 2024 na Cidade da Luz.
