- O Torneo Intercentros da cidade olívica é a competición deste perfil con máis equipos participantes levado a cabo en Galicia ata o momento neste disciplina calculándose unha participación duns 300 futbolistas.
- Previamente a esta competición a Asociación Galega de Fútbol Gaélico colaborou cos centros participantes dentro do seu proxecto Gaélico Escolas Punto Gal achegando material pedagóxico ao profesorado.
A base do fútbol gaélico volve ser actualidade esta vez en terras viguesas. A cidade olívica celebra o seu primeiro Torneo Intercentros desta modalidade. A cita deportiva terá lugar os días 12-13-14 de febreiro no Campo de Fútbol da Universidade de Vigo. Esta actividade enmárcase dentro do traballo coa base que se leva a cabo desde a Asociación Galega de Fútbol Gaélico (AGFG) a través das Gaélico Escolas Celtic Cup e faise en colaboración co Servizo provincial de Deporte Escolar, que achegou a proposta aos centros educativos e facilitou a instalación e o transporte.
O arranque no pode ser mellor neste primeiro Torneo Intercentros de Fútbol Gaélico en Vigo xa que a cita xunta a 11 equipos o número máis grande de participantes superando as competicións similares levadas a cabo en lugares como Compostela ou Lugo. Calcúlase unha participación duns 300 futbolistas. Esta competición é mixta.
Calendario do Torneo Intercentros de Vigo
O calendario de competición previsto é:
- 12/2/2025: Ricardo Mella, Barreiro, Monterrey e Alborada
- 13/2/2025: Santa Cristina, Bouza Brey, El Castro e San Miguel
- 14/2/2025: Labor, Mercantil e Vista Alegre
As xornadas do Torneo Intercentros son de 10:00 a 12:00 horas. Os partidos dispútanse 9×9 nun campo de Fútbol 7.
Na tempada 2023-24 no fútbol gaélico en Galicia fíxose un esforzo para achegar esta modalidade á cativada, e neste curso 2024-25 o camiño é similar. Daquela a Asociación Galega de Fútbol Gaélico levou este deporte a 21 centros educativos nos que 2.153 escolares recibiron unidades didácticas sobre esta disciplina. No caso do Torneo Intercentros de Fútbol Gaélico de Vigo tamén se fixeron visitas previas aos centros escolares, impartíronse catro sesións de fútbol gaélico nas aulas de educación física e subministrouse ao profesorado material pedagóxico para que poidan seguir traballando sobre esta material pola súa conta.
Sobre a Asociación Galega de Fútbol Gaélico (AGFG)
A Asociación Galega de Fútbol Gaélico (AGFG) é o organismo regulador oficial do fútbol gaélico en Galicia, dende a súa aprobación oficial na convención Europea dos deportes gaélicos en decembro de 2013, o cal garántelle de carácter oficial internacional recoñecido polo máximo órgano, a Gaelic Athletic Asociation (GAA).
Boa parte das actividades da AGFG intégranse dentro da RFGF (Real Federación Galega de Fútbol).
PuntoGal é un dos patrocinadores da AGFG que ademais emprega na súa web o dominio www.gaelicogalego.gal.
