Malia o gran estado de forma de Belén Toimil nesta tempada, a mugardesa non puido chegar á final olímpica do lanzamento de peso. Este venres, a atleta galega competiu nas probas clasificatorias, con dous lanzamentos nulos e outro a 17.38, quedando a cinco centímetros da final.
“É unha pena porque me atopaba moi ben e sabía que era capaz de facer a marca que pedían”, declarou a deportista aos micrófonos de RTVE tras a competición. Cos seus resultados, a mugardesa rematou 12ª.
Toimil, quen debutaba nos Xogos Olímpicos chegando á competición como a mellor lanzadora de peso ao aire libre, xa obtivera esta tempada unha marca de 18.80, a súa mellor marca persoal.
Porén, no concurso olímpico a galega non puido demostrar o seu talento. Os dous primeiros lanzamentos foron declarados nulos, debido a fallos na técnica. Á hora de lanzar o terceiro e último intento, a propia atleta confesou facelo “con medo, para non sairme”.
“Intenteino a morte, pero non me saiu”
Na conexión con RTVE, a mugardesa explicou que o motivo da súa actuación non foron os nervios. “Atopábame ben e moi tranquila, pero non me saiu. Foron tres lanzamentos e intenteino a morte nos tres. Dame rabia porque sei que estou forte, sei que son capaz de facelo. Non puido ser e da moita rabia porque a final olímpica estaba moi preto e quedarse fóra da moita rabia. Pero bueno, outras competicións verán”, declarou.
Toimil: “Dame rabia porque sei que podía telo feito e estou adestrando moi ben”
Para Toimil, os seus lanzamentos nas problas clasificatorias de Toquio “non refrexan en absoluto do que son capaz. Nos dous primeiros fun a morte, pero sainme da marca, non puiden aguantar dentro do círculo e dame rabia porque sei que podía telo feito e estou adestrando moi ben. Estes días aquí atopeime moi ben, pero é a competición. Non sempre sae ben, pero lévome a aprendizaxe tamén supoño”, expresou.
