O partido definitivo para o Dépor ABANCA nesta tempada 2022-23 ten data e hora. Mañá, sábado 9 de xuño, ás 12:00 horas na Cidade Deportiva de Abegondo. En fronte terá como rival ao Granada CF. O partido é a volta da eliminatoria de play-off de ascenso á Liga F. O último chanzo para as deportivistas de cara ao seu ansiado retorno á elite. Espérase un cheo en Abegondo. O partido poderá verse tamén a través da canle de YouTube do RC Deportivo e na TVG-2.
Non o terán doado As Nosas deportivistas que terán que darlle a volta a un marcador adverso colleitado no partido de ida. No Estadio Nuevo Los Cármenes as xogadoras que adestra Irene Ferreras perdía por 2-0. Os últimos oito minutos de partido quebraron un 0-0 que daba máis azos ás galegas e lles facía soñar con facer bo o fortín de Abegondo.
Con este 2-0 o Dépor ABANCA deberá poñer toda a carne no asador e saír a por todas. O resultado da ida require que venzan por máis de dous goles de diferenza ao termo dos 90 minutos ou por dous ou máis tantos ao finalizar a prórroga, co que igualarían o marcador da ida e lograrían o obxectivo sen lanzar penaltis debido á mellor clasificación na liga: terceiras as deportivistas por quintas as granadinas.
E de gañar partidos na prórroga facendo boa a mellor clasificación xa saben algo as galegas que chegaron a este punto da competición xustamente baixo desa premisa.
A adestradora das galegas, Irene Ferreras, declaraba na rolda de prensa previa ao partido contra do Granada CF, que “o factor campo para nós vai ser fundamental. O feito de xogar a volta en casa permítenos esa capacidade de reacción”.
Ten claro a adestradora deportivista que “vai haber algo especial, un plus máis de enerxía. Temos que saír a dalo todo, non nos podemos deixar absolutamente nada. O Club envorcouse para que teñamos o maior contexto de arroupo posible. Ademais de competir e demais, témonos que permitir o luxo de gozar de algo así, dun momento así”.
Subliña Irene Ferreras que “vivir un momento así é un privilexio. Durante toda a temporada aquí a nosa forza axudounos moitísimo. Agora van botar o resto para sacar esta proeza adiante, que creo que é posible. Cada día desta semana nos habemos ir alimentando desa idea e realmente crémolo posible”.
O Dépor ABANCA afronta o partido sen baixas
Todo o cadro deportivista está a disposición da adestradora madrileña Irene Ferreras, ademais da canteirá Paula Monteagudo, que xa é unha habitual nas convocatorias do primeiro equipo branquiazul.
Pola súa banda, o Granada CF apeou en semifinais ao CDF Osasuna con vitoria nos 2 partidos: 2-0 en casa e 0-3 en Tajonar.
O seu técnico, Roger Lamesa, manifestou que após derrotar ao Dépor ABANCA na ida “foi unha semana bonita de adestramentos. Vimos de moitas emocións moi bonitas nos Cármenes e entón o equipo está a traballar moi ben, está a ter moi boas sensacións e con moitas ganas de viaxar á Coruña”.
Lamesa avisa de que o Dépor é “o máis forte da categoría” na casa
O adestrador granadino lembra que no partido de mañá “hai un factor resultado que hai que ter en conta. O noso adversario pódeche facer cambiar o marcador e pódeche facer sentir pantasmas; e viceversa, ti cun gol podes facerlle entrar pantasmas ao teu adversario”.”
Vaticina un partido “moi emocional” e lembra que o Dépor ABANCA “no seu campo é probablemente o equipo máis forte na súa categoría”.
De feito espera a un equipo deportivista “con moitas ganas de darlle a volta ao marcador. Van saír a por todas, empuxadas pola súa afección. Entendemos que vai ser un partido moi complicado, quizais o máis complicado da temporada fóra de casa”.
#AsNosas convocadas para a final do playoff de ascenso a #LigaF, o #DéporABANCAGranada de mañá ás 12:00 h. na Cidade Deportiva de Abegondo (📺 https://t.co/BRgppwOSdO e APP 📱 RC Deportivo)!#SóQueroCrer pic.twitter.com/viSuSVyOSg
— RC Deportivo (@RCDeportivo) June 9, 2023
As deportivistas queren repetir o ascenso do 2019 daquela co lema “Un único latexo”. Daquel equipo aínda está a capitá, Cris Martínez. Seguro que está desexando repetir experiencia e retornar á elite defendendo a elástica do Dépor ABANCA.
