O vindeiro sábado 10 de Xuño de 2023 o club Gallaecia Raid organiza o Raid Cidade de Narón 2023. Esta proba de longa distancia percorrerá os concellos de Narón, Ferrol, Neda e Valdoviño e forma parte da Liga Galega de Raids de Orientación 2023.
O Raid Cidade de Narón 2023 é dunha carreira con base de orientación e resistencia, na que o percorrido é segredo para os participantes, os cales só coñecerán o devandito percorrido cando se lles entreguen os mapas, no momento da saída e nas diferentes transicións.
O Raid Cidade de Narón terá tramos de bici, patíns e kaiak
As persoas participantes progresarán en equipos de entre dous e cinco corredores, con ou sen substitución, segundo categoría. Para elo, farán uso de diferentes medios de progresión, como a carreira a pé, a bicicleta de montaña, os patíns e o kaiak. Haberá tamén probas especiais que requirirán o uso de cordas ou habilidades específicas de orientación.
O programa da competición iniciarase as 9:00 am coa apertura de secretaría, para a recollida de documentación e bolsa do corredor. As 10:00 am se dará a saída as categorías 3.0 e 2+1., e as 12:30 saldrán os equipos de Orienta Raid. O peche de meta será as 19:00 horas. A continuación, as 19:30 farase a entrega de trofeos.
Dado que os participantes teñen un tempo de 9 horas para realizar a proba, levarán consigo material obrigatorio como unha mochila, comida enerxética, recipiente para bebida, manta térmica e chifre, caixa de primeiros auxilios, e teléfono móbil, así como a súa propia bicicleta de montaña e casco homologado. A organización tamén recomenda portar outros materiais como compás, roupa axeitada a climatoloxía, ferramenta para a bicicleta, etc.
Compromiso de Gallaecia Raid co coidado da contorna
Dende o seu compromiso co medio ambiente, explican desde o club Gallaecia Raid que acordaron “adoptar unha serie de medidas dentro da área de competición, desde o punto de vista ecolóxico. Por iso, non realizaremos marcas nin sinais identificativas permanentes para a proba. Tan só poderían estar marcados como información e seguridade (mediante cinta de balizado) tránsitos curtos dende a saída (cintas reutilizadas de carreiras previas)”.
Detalla desde o club Gallaecia Raid que “nos puntos de concentración, secretaria e transicións, colocaranse diferentes colectores para a selección de residuos. Empregaremos pancartas da zona de saída, reutilizadas de carreiras previas. Tamén procederemos á retirada de todo tipo de sinalización instalada o mesmo día da proba e tras a finalización desta, así como á eliminación de todos os residuos eventualmente xerados”.