Chegou a hora da Coruña 10. A cidade herculina transforma a súas rúas unha vez máis en territorio competitivo e faino con preto de 3.000 persoas inscritas a esta carreira popular que terá lugar o domingo 24 de abril. Estará na liña de saída Solange Pereira, a corredora con máis C10 no seu palmarés, e tamén a atleta kenyana Valentine Jebet que vén de gañar hai nada a Coruña 21.
No Parrote coruñés tomarán a saída máis de 2.200 persoas na categoría absoluta. Son varios os e as atletas de renome que estarán no asfalto coruñés. Solange Pereira, a atleta que máis títulos ten nesta proba, volve ao asfalto coruñés.
A décimo sexta edición de Coruña 10 contará cunha participación destacada en número e nomes nun circuíto que se deseñou para bater marcas persoais e comprometer os récords da proba, que quedaron establecidos en 2009 (28:09 en homes e 31:40 en mulleres).
Son varios os e as atletas para ter en conta no circuíto urbano e rápido da Coruña. Volverá pisalo Javi Guerra, aínda que será a súa primeira Coruña 10. Na nómina de corredores figura Alejandro Fernández, que se impuxo en tres ocasiones nesta proba, a última en 2018. En mulleres, competirá a atleta que levou Coruña21 en febreiro, a tamén kenyana Valentine Jebet.
O récord de triunfos en Coruña 10, con catro, teno Solange Pereira, que confirmou a súa participación na carreira deste domingo. “Non todos os atletas poden engadir ao seu currículo deportivo unha carreira que xa se converteu nunha das máis emblemáticas do panorama galego e nacional”, asegura a deportista.
Entre a presenza destacada de atletas incritos salienta a participación xa citada do fondista olímpico Javier Guerra quen xa no ano 2013, proclamábase campión de España de marathon na edición desenvolta precisamente na cidade da Coruña paralelamente a C42. Ten o récord da proba herculina, sendo segundo en C21 no 2014. Este domingo afrontará o reto de sumar á menor das tres grandes do calendario da cidade ao seu curriculo de competicións.
Xunto a el tomarán parte importantes atletas africanos entre os cales poderemos ver aos etiopes Melaku Birhan Aregu, Mohamed Yenework Husen, Dominick Kipkirui Bett así como ao keniata Kipyegon Nehemiah entre os homes e a Takele Chernet Misganaw (ETH) e a citada previamente Valentine Jebet (KEN), entre as mulleres
A RFEA considera a C10 a 6ª mellor 10K de España
É a décimo sexta edición e a carreira foi evolucionando ata o punto de ser a sexta mellor 10K de España segundo a RFEA. “Leva anos crecendo. Sempre me gustou como tratan ao corredor, ao público e como sacan partido da cidade da Coruña. É unha carreira especial”, afirma Solange Pereira, que considera A Coruña “unha das cidades máis bonitas de España”.
A sexta mellor carreira 10K de España, segundo a Real Federación Española de Atletismo, mantén un importante número de inscripcións que a converten nunha das máis numerosasa de cantas se desenvolven na nosa Comunidade. Chégase a preto de 3.000 participantes. Este ano por fin a normalidade estará presente en todo o percorrido logo das restricións do ano pasado que obrigou entre outras, a limitar o número de inscritos e inscritas ata os 1.400.
Como mostra da normalidade regresarán nesta edición as probas de menores sobre distancias que oscilan entre os 150 metros para os máis cativos ata os 2500 m. para os Sub18, segundo informa a Federación Galega de Atletismo.
Solange Pereira: “O récord da proba é estratosférico”
Este ano cambiou o circuíto, agora o máis rápido da historia. “Teño moitísimas ganas de correr e comprobar se podo facer un gran crono. Creo que un bo circuíto é fundamental para que unha carreira sexa máis ou menos atractiva e Coruña 10 teno”, sostén Solange Pereira.
Considera Solange que o récord da proba é “estratosférico” e non se ve baténdoo. “Quedarei satisfeita se son capaz de mellorar o meu mellor rexistro obtido na proba (34:40)”, recoñece.
Solange Pereira: “Quedarei satisfeita se son capaz de mellorar o meu mellor rexistro obtido na proba (34:40)”
Habitual do asfalto coruñés é, tamén, Esther Navarrete, que sumará outra edición de Coruña 10. Este ano foi sexta no campionato de España de 10.000 metros e bateu, en marzo, o récord galego nesa distancia en ruta (32:40.
Solidariedade con Ucraína a ritmo de zumba
A décimo sexta edición da carreira Coruña 10 contará cun circuíto preparado para mellorar marcas ao que se engadirá o seu carácter solidario, xa que recadará fondos para a asociación AGA-Ucraína. A camiseta conmemorativa, de cor azul luar para maiores e turquesa para menores, fai referencia ao país que foi invadido por Rusia.
Os fondos recadados irán destinados á Asociación Galega de Axuda a Ucraína (AGA-Ucraína) co obxectivo de dotar os hospitais ucraínos do material necesario para atender as persoas feridas pola guerra. Concretamente, desde o goberno de Ucraína reclámanlles ás ONGs que colaboran con eles que precisan apósitos e medicamentos para interromper hemorraxias.
De igual modo, e cando a carreira conclúa, a actividade física continuará con zumba. A empresa que xestiona o Complexo Deportivo Municipal de San Diego, Supera, collerá a substitución do atletismo ás 12:15 horas no Parrote desde o palco no que se entregarán os trofeos. Esa actividade extra recadará fondos para a ONG Asociación Galega de Axuda a Ucraína (AGA-Ucraína).
Especial atención aos peques
A carreira máis popular do atletismo coruñés facilitou a inscrición gratuíta para os e as participantes menores de 18 anos. Ademais, recibirán unha camiseta de agasallo e, no caso da categoría Peques, unha medalla por participar. Os centros escolares teñen tamén a oportunidade de levar 500 euros en material deportivo grazas á colaboración de Decathlon. O cole que máis alumnado presente en Coruña 10 obterá ese premio.
As distancias (aproximadas) serán de 100 metros para peques; pasará a 820 metros nas categorías sub-10 e sub-12; en sub-14 subirá a 1.420 metros e para sub-18 e sub-16, 2.335 metros. Estas probas celebraranse o domingo 24 de abril a partir das 11:35 horas.
Caixóns da Coruña 10
Serán seis caixóns que se distribuirán segundo os dorsais asignados. As persoas participantes deberán estar no seu postos dez minutos antes do disparo oficial de saída. O caixón azul será para quen teña unha marca inferior a 36 minutos; o laranxa, para menos de 41 minutos; o amarelo, por baixo de 46 minutos; o rosa, para quen rexistrase un tempo inferior aos 51 minutos; o verde para menos dunha hora e o resto, utilizarán o vermello.
| Cor | Tempo | |
| Caixón 1 | menos de | 0:36:00 |
| Caixón 2 | menos de | 0:41:00 |
| Caixón 3 | menos de | 0:46:00 |
| Caixón 4 | menos de | 0:51:00 |
| Caixón 5 | menos de | 1:00:00 |
| Caixón 6 | resto |
Estos son os servizos da carreira
Segundo informa o Concello da Coruña a carreira Coruña 10 contará cos seguintes servizos:
- As persoas participantes dispoñerán de servizo de gardarroupa en horario de 9 a 12 horas.
- Habilitarase un servizo de duchas no Frontón Municipal de Riazor entre as 10 e as 14 horas (ensinando o dorsal).
- Tamén se ofrecerá servizo de fisioterapia nas inmediacións da zona de meta (Parrote).
- Colocaranse baños para os/as atletas na zona de saída.
- Situarase un posto de avituallamiento a metade do percorrido, no cruzamento da Avenida do Exército coa Estrada do Porto, e outro na zona de meta. Habilitaranse colectores de uso obrigatorio para a recollida de residuos,
Así será o dispositivo de mobilidade da C10
Os tramos polos que discurrirá a Coruña 10 estarán pechados á circulación. Así, ás 09:30 horas pecharase o circuíto ao tráfico para a celebración da carreira, que comezará ás 10:00 horas. O dispositivo concluirá cara ás 12:30 horas.
Estas son as afeccións ao tráfico rodado previstas co gallo da celebración da carreira Coruña 10:
- AC-11.- A entrada e saída á Cidade pola AC-11, (Av. de Alfonso Molina), estará afectada no viaduto, á altura da Ronda de Nelle; cortarase o carril esquerdo de acceso. Este carril utilizarase para dar saída aos vehículos entre a Av. do Porto ata o paso de peóns que está á altura de Fernández Latorre.
- Acceso ao Porto.- O acceso ao Porto estará cortado, salvo situacións de necesidade ou urxencia, durante o tempo de desenvolvemento de carreira .
- Acceso a REPSOL e Oza.- O acceso a estes lugares realizarase desde a glorieta de Casabranca/Casabranca a través da AC-10.
- Acceso á Casa do Mar.- Desde a Costa da Palloza está operativo un carril que permite o acceso ao servizo de urxencias da Casa do Mar e a saída ata Ramón e Cajal.
- Saída da Cidade desde Praza de Ourense.- Habilitarase un carril desde Praza de Ourense cara a AC-11 (Av. de Alfonso Molina)
Desde as 09:30 horas procédese ao peche do circuíto da Coruña 10 coas seguintes ramificacións:
- Ata as 10.35 h. corte total do San Andrés- Rúa Alta-Paseo Marítimo, tramo Curros Enríquez- Calvo Sotelo.
- Ata as 10.45 h. corte total de Rubine-Praza Pontevedra-Juana de Veiga-Sánchez Bregua.
- Ata as 11.15 h. corte total de Estrada do Porto e viarios interiores do porto
- Ata as 11.45 h. corte parcial de Linares Rivas, Primo de Rivera
- Ata as 11.45 h. corte total de Cantón Pequeno – Cantón Grande- Avda. a Mariña.
Quedan suprimidas as paradas do transporte metropolitano de Praza de Ourense e Entrejardines, manténdose Catro Camiños (de 9.30 a 11.45). A Lembra que a apertura do Paseo Marítimo Praias producirase ás 10.35 horas.
