Esta fin de semana celébrase no Lago das Pontes a segunda edición do Beach Rugby Vila das Pontes, un torneo de rugby praia que reúne aos mellores xogadores e xogadoras de España.
Este torneo está organizado pola AD Monte Medulio e o Concello das Pontes, patrocinado por Servicio Móvil, e conta coa colaboración de entidades como Turismo As Pontes, o CR Fendetestas e a Deputación da Coruña. O torneo está enmarcado dentro das Series Españolas de Beach Rugby, que decidirán xusto esta fin de semana os equipos campións en ambas categorías.
Nove equipos femininos, no 2º Beach Rugby Vila das Pontes
Nesta edición participarán 250 deportistas, formando 9 equipos masculinos e 9 equipos femininos. Esta cita deportiva dará comezo o venres 5 de agosto ás 21:00, co sorteo de grupos e a festa de benvida.
O sábado é o día grande, con partidos en categoría masculina e feminina desde as 10 da mañá ata as 20:00 horas pola tarde. Ademais, durante o día, as persoas asistentes poderán desfrutar dunha zona VIP / networking e dunha área destinada á animación infantil.
Ver esta publicación en Instagram
Ás 21:30 terá lugar a entrega de trofeos, seguida do tradicional terceiro tempo, que estará amenizado polo concerto do grupo Sintrom ni Son.
Deste xeito, nestes días pasearanse pola area do Lago das Pontes caras coñecidas do rugby a nivel internacional, como a ex-xogadora da Selección Española de rugby Rocío García Eiras e varias xogadoras do CRAT A Coruña de División de Honra.
A entrada ao evento é de balde e agárdase moi bo ambiente nas inmediacións do Lago, que abre con este evento un mes completo dedicado á celebración do seu décimo aniversario. Para máis información, visitar a web www.crfendetestas.com.
