Esta fin de semana decidirase que equipo do grupo 1C da Primera Nacional consegue o billete para o play off de ascenso a Reto Iberdrola. A xornada pinta ben para as galegas, con dous equipos como os favoritos para lograr o pase: o Victoria CF e o Viajes Interrías.
Despois dunha primeira fase e unha segunda que está a piques de chegar ao seu fin, con máis dunha veintena de partidos disputados para os clubs irmandiños, o soño do ascenso está á volta da esquina.
Para competir en igualdade de condicións, co equipo que dispute o play-off aínda por decidir, a derradeira xornada da Primera Nacional xogarase de maneira unificada. Todos os partidos serán este domingo, 30 de maio, ás 12:00 horas. Ademais, os equipos compiten fóra de Galicia, polo que a clasificación en calquera caso celebrarase lonxe de casa.
A Primeira Nacional pecha a segunda fase con xornada unificada
O Victoria CF, o mellor posicionado
As cebras do Victoria CF, adestradas por Cris Oreiro, son as líderes do grupo 1C e, polo tanto, as mellor posicionadas para pasar á última fase da competición da Primera Nacional.
As coruñesas conseguiron arrebatarlle a primeira posición ao Real Oviedo B na quinta xornada, cando venceron ás asturianas por un 2-1. Agora, as de Oreiro afrontan a última fin de semana da segunda fase coa tranquilidade de ocupar a posición de ouro, e a única que da o pase á seguinte fase.
Este domingo, o rival das galegas será o CDE Racing Féminas B. As herculinas compiten na xornada decisiva contra o colista do grupo, ao que superan por 18 puntos. Ademais, este duelo enfronta a dúas das máximas goleadoras do grupo, Naara nas locais e María nas visitantes.
O Victoria CF leva un balance de 15 vitorias, tres empates e tres derrotas, con 48 puntos no seu casilleiro e un coeficiente do 2,286 puntos.
O Viajes Interrías aínda ten opcións de meterse no play off
Pisándolle os talóns está o Viajes Interrías. O outro favorito para o play-off da Primera Nacional suma un punto menos que as coruñesas, cun total de 47, e un coeficiente moi similar, cun 2,238.
O conxunto de Luís Treviño volveu na última xornada á segunda posición coa que comezou a segunda fase da Primera Nacional, despois dunha parte desta competición máis irregular. Nesta seis xornadas, as galegas sumaron tres vitorias e un empate.
Para esta derradeira fin de semana, as galegas enfrontaranse ao Real Oviedo B, líder ata a quinta xornada e un dos equipos máis fortes do grupo. As asturianas son actualmente terceiras, con 41 puntos e un coeficiente de 2,158, moi preto dos dous conxuntos irmandiños.
