Quen se suma a unha San Silvestre faino para rematar o ano facendo deporte, pero normalmente é alguén que quere tamén facelo cun sorriso. En Compostela non habían ser menos. A competición gañouna Pablo Otero Fariña, do Club Atletismo Torrelavega, sendo a primeira muller Tina Fernández Barreiros, do Club Atletimo SAR, pero o sorriso gañárono o milleiro de persoas que tomaron parte nesta cita.
Cinco quilómetros de percorrido pola zona centro de Santiago de Compostela era o reto. A meta, como no caso de quen peregrina pola ruta Xacobea, era a praza do Obradoiro. As santiaguesas e santiagueses tiñan ganas de volver a gozar do atletismo popular e da súa San Silvestre e lanzáronse ás rúas da capital galega no último día do ano.
A de 2021 foi a oitava edición dunha carreira popular que organizaba o Concello de Santiago, a través do seu departamento de deportes, e a Federación Galega de Atletismo. Nesta ocasión, a proba correuse sobre un circuito de 5 km en ruta homologados pola Federación, así, as marcas obtidas pasan ao ránking galego e nacional na distancia.
A competición da San Silvestre de Compostela empezou ás 17:00 horas da tarde con saída na avenida de Xoan XXIII. As e os corredores foron saíndo en quendas de 300 persoas máximo para cumprir un estricto protocolo de prevención da transmisión da COVID-19. Nese paquete de medidas tamén estaba o uso de máscara durante toda a carreira. De feito, a organización tiña previsto un cambio de máscara na Praza de Galicia (contra o kilómetro 3 de carreira), por se ao suar era preciso mudala.
Resultados da San Silvestre de Compostela 2021
A primeira persoa en cruzar a meta foi Pablo Otero Fariña, corredor do Club Atletismo Torrelavega (15:24). O segundo foi Antón Gómez González, do CD San Paio, e terceiro Pablo Carnero, do Club Atletismo O Pino. O podio feminino foi para Tina Fernández Barreiros, do Club Atletismo SAR (18:55), seguida de Carolina Santos Villalón, do Ría de Ferrol, e Rebeca Mariño Torrado, do Beste Iruña Atletismo Taldea.
Con roupa de deporte ou disfraz, o milleiro de persoas que correron a San Silvestre compostelá fixérono gozando do deporte, en familia, con amizades, ou en solitario. Tanto ten, o caso é rematar o ano coas zapas postas!
Ver esta publicación en Instagram
