O Diario Oficial de Galicia (DOG) publica hoxe a resolución pola que a Xunta de Galicia concede a Medalla Emilia Pardo Bazán á política galega e ex conselleira, Manuela López Besteiro; á deportista olímpica, María Teresa Portela Rivas; e á Unidade de Policía Nacional Adscrita de Galicia (UPA), encargada da protección das mulleres vítimas de violencia de xénero.
A Medalla Emilia Pardo Bazán é un recoñecemento ao labor que desenvolven as persoas e institución premiadas a prol da igualdade de xénero entre mulleres e homes en Galicia. Este galardón foi creado pola Xunta no ano 2019 para conmemorar publicamente todas as accións que contribúen á sensibilización social e a dar visibilidade ao talento das mulleres e de todas as entidades comprometidas coa eliminación da discriminación de xénero e a construción dunha sociedade máis igualitaria.
A Xunta concede as Medallas Emilia Pardo Bazán de 2025 a:
Manuela López Besteiro
María Teresa Portela Rivas
UPA (Unidade de Policía Nacional Adscrita de Galicia)
Parabéns e grazas por contribuír á construción dunha sociedade máis igualitaria pic.twitter.com/0nSBkq5nCQ
— Igualdade en Galicia (@igualdadegal) July 11, 2025
Este recoñecemento leva o nome de Emilia Pardo Bazán, muller precursora na defensa dos dereitos das mulleres e do feminismo, así como do acceso á educación das mulleres, ideas que trasladou á súa obra literaria.
Teresa Portela, a española con máis participacións olímpicas
Nesta ocasión, o xurado distingue a Teresa Portela, padexeira olímpica galega coa Medalla Emilia Pardo Bazán. Esta deportista é todo un referente consolidado na defensa dos dereitos das mulleres e á hora de dar visibilidade ao papel do deporte feminino. O seu esforzo e dedicación ao longo destes anos, rompendo barreiras sociais, amosa ás novas xeracións a importancia da igualdade en todos os eidos da sociedade.
A padexeira Teresa Portela é a deportista española con máis participacións olímpicas. Competiu ata o de agora en sete Xogos Olímpicos consecutivos.
A deportista de Cangas estivo en Sidney 2000, Atenas 2004, Pekin 2008, Londres 2012, Río 2016, Tokio 2020 e París 2024. Nos xogos de Tokio acadou a medalla de prata no K1 200 metros. Foi diploma olímpico en París (K4 500), Río (K1 200), Londres (K1 200), Pekín (K4 500) e Atenas (K4 500).
Outro dos tres recoñecementos, recae en Manuela López Besteiro, política galega que exerceu de conselleira de Familia, Muller e Xuventude entre os anos 1993 e 2002, nunha época na que desenvolveu un labor fundamental para reivindicar os dereitos das mulleres e dar visibilidade á importancia da conciliación e da corresponsabilidade como garantía dunha sociedade máis igualitaria.
Recoñecemento á UPA pola protección ás vítimas de violencia de xénero
Pola súa parte, a Unidade de Policía Nacional Adscrita de Galicia (UPA) é a encargada de dar protección ás mulleres vítimas de violencia de xénero e que forman parte do sistema Viogen. Deste xeito, preténdese recoñecer o traballo que desenvolven cada día acompañando a todas estas mulleres e representando un papel destacado tamén na súa recuperación.
