Constancia, traballo, dedicación, profesionalidade, esforzo e sobre todo iso: perseverancia. Todos eses calificativos pódense aplicar á traxectoria deportiva de Teresa Portela (Cangas do Morrazo, 1982).
A padexeira de Cangas, máis concretamente de Aldán, é historia viva, e moi viva, dos Xogos Olímpicos en Galicia e tamén en España. Alcanza por sétima vez o dereito a competir nesta cita deportiva que é a festa por excelencia no deporte. E faino con serias opcións de alcanzar medalla.
Sabe perfectamente como vai isto dos Xogos Olímpicos. Estivo en Río, en Londres, en Pekín, Atenas, Sydney e Toquio. Non foi ata estes últimos que puido saborear un metal. A medalla de prata que acadaba no K1 200 foi o froito de moitos anos de esforzo, traballo e de insistir na persecución dun soño. “Quen a segue, conséguea”, di cando fala dese momento.
O seu de Toquio foi un triunfo que moitas persoas sentimos como se fose propio. Un pódese feito realidade. Un claro que si! Un brava! viña ás nosas cabezas coma un berro xordo. Vela no podio agarrando esa prata púxonos un nó na gorxa a e fíxonos agromar algunha bágoa cómplice por que o seu era un triunfo do esforzo, do traballo e da perseverancia.
Foi unha vitoria basada unha das leccións do deporte: pérdese máis do que se gaña e hai que aprender das derrotas para erguerse máis fortes cara ao seguinte chanzo. E se non sae, volvelo tentar ata que a cousa se dea. E se non se dá, ter claro que fixeches todo o que estaba na túa man para loitalo. O deporte é sacrificio por iso cando logo de moito esforzo acadas algo tan importante como unha medalla olímpica, a alegría desborda.
Teresa Portela aspira a medalla en París
En París 2024 a padexeira canguesa vogará no último posto no K4 500m con outras tres deportitas. Algunha, como a tamén galega Carolina García, tíñaa como referente cando empezaba a despuntar no piragüismo. E aí está Teresa Portela, ao mesmo nivel deportivo que as novas xeracións aportando a forza das súas padas e a intelixencia da súa experiencia. Quen dá máis?
O caiac non ten segredos para ela. Este ciclo olímpico, ademais, puido prepararse preto de casa, en Verducido. Todo pinta ben. Na tripulación deste K4 500 m respírase concentración e seguridade. Veñen de demostrar coas súas actuacións que son serias candidatas a subirse ao podio.
Sara Ouzande marcando o ritmo no primeiro posto, detrás Estefanía Fernández, logo Carolina García e pechando o barco Teresa Portela. De xeito individual son boas, como cuarteto forman un equipo extraordinario. Están compenetradas, preparadas e dispostas a dalo todo no Estadio Náutico Vaires-sur-Marne onde se disputan as competicións de auguas tranquilas. Debutan o 6 de agosto ás 10:00 horas.
Unha traxectoria que empezou con nove anos
Teri Portela subiuse a un caiac por vez primeira con nove anos. Agora, con 42 e 24 anos na elite (si, ambos os dous números fan un capicúa precioso) está no seu mellor momento. Ten 5 diplomas olímpicos, unha prata en Toquio 2020, tantas medallas en Mundiais, Europeos e Copas do Mundo, de España, galegas… que fan perder a conta. Pero o que ela non perde é a ilusión.
Disciplinada, educada, organizada e puntual, suma aos seus méritos deportivos unha sólida formación académica. Ten un Grao en Fisioterapeuta, unha Diplomatura en Maxisterio de Educación Física e prepara un Grado de Nutrición Humana e Dietética. Xunto á súa parella, o tamén padexeiro David Mascato, rexenta un centro de Fisioterapia no Grove (Mascato & Portela). De onde saca o tempo… non me pregunten. So podo asegurarlles que o día ten 24 horas tamén para ela.
Ademais do recoñecemento e o agarimo do público, Teresa Portela ten tamén o das institucións. Foi Medalla Castelao da Xunta de Galicia no 2019 e Medalla da Real Orde do Mérito Deportivo do Consello Superior de Deportes (CSD) en dúas ocasións, (bronce no 2024 e prata no 2013).
A súa filla, Naira, estará en París para vivir xunta ela en familia un momento histórico. A conciliación da súa carreira deportiva coa súa faceta como nai é outra das cuestións que fan de Teresa Portela un referente no deporte.
Di na súa web oficial: “Todo o que teño, todo o que son é grazas ao piragüismo”.
Ver esta publicación en Instagram
