- O sábado e o domingo dispútase na enseada do Orzán da Coruña unha das probas deportivas máis lonxevas do calendario coruñés a Bandeira Teresa Herrera de Traiñeiras.
- Na cita, que decidirá os títulos de campioas e campións da LGT conta coa participación de 28 embarcacións.
- O barco do CR Cabo da Cruz chega como favorito para acadar o título feminino xa que as remeiras de Boiro abóndalles con chegar quintas á boia de meta.
Esta fin de semana disputarase na enseada do Orzán do Concello da Coruña a Bandeira Teresa Herrera de traiñeiras, última proba da Liga Galega de Traiñeiras (LGT). Será unha regata de máxima rivalidade, xa que se disputará o título masculino e feminino. A concelleira de Deportes da Coruña, Mónica Martínez, encargouse de presentar a proba este martes no Predio dos Mariño. Estivo acompañada polo presidente da Federación Galega de Remo, José Manuel Seijas.
Un total de 28 embarcacións participarán este sábado 27 de agosto na clasificación da sexta regata e segunda bandeira Teresa Herrera feminina e na edición 36 e 14ª bandeira do Trofeo Terresa Herrera masculino de traiñeiras. Esa xornada clasificatoria será a que puntúe para a Liga Galega de Traiñeiras. O título na competición masculina disputarase entre Samertolameu-Oversea e Bueu-Teccarsa, aos que só separa un punto na xeral. O mellor clasificado de ambas as embarcacións levará este sábado o título e a camisola amarela.
Na competición feminina, CR Cabo da Cruz só precisa 4 puntos para levantar o título, algo que aínda pode disputarlle CR Cabo da Cruz.
O domingo, tras a conclusión da Liga Galega de Traiñeiras, será a xornada final da Bandeira Teresa Herrera, na que se enfrontarán as dez mellores embarcacións masculinas e as cinco mellores femininas clasificadas na véspera. A Bandeira Teresa Herrera é unha das citas deportivas máis lonxevas do calendario coruñés, xa que leva disputándose na enseada do Orzán desde 1986. “A Coruña ten unha tradición moi rica en traiñeiras, un deporte que cada vez cobra máis atención pola espectacularidade das imaxes que deixa. Non cabe dúbida de que este escenario da lugar a fermosas imaxes que fan que presumamos de cidade”, apuntou a concelleira herculina Mónica Martínez durante o acto de presentación da Bandeira Teresa Herrera.
Mónica Martínez, concelleira de Deportes: “A Coruña ten unha tradición moi rica en traiñeiras, un deporte que cada vez cobra máis atención pola espectacularidade das imaxes que deixa. Non cabe dúbida de que este escenario da lugar a fermosas imaxes que fan que presumamos de cidade”
Horarios da Bandeira Teresa Herrera de traiñeiras
Os horarios da Bandeira Teresa Herrera de Traiñeiras para o sábado 27 de agosto serán os seguintes: ás 17.30 horas celebrarase a regata de play-off, ás 18.00 horas será a regata de clasificación feminina, ás 18.30 horas disputarase a primeira quenda da Liga Galega masculina na categoría B e ás 19.00 horas será a segunda quenda das embarcacións pertencentes á categoría A, tras a que se celebrará a entrega de trofeos da competición na contorna do Palacio dos Deportes de Riazor.
Xa na xornada do domingo 28 de agosto, a competición comezará coa ofrenda á xente do mar, ás 11.30 horas. Ás 11.45 comezará a regata feminina, mentres que ás 12.15 será a proba masculina.
Ás 13.30 horas está previsto que sexa a entrega de premios no Predio dos Mariño.
