Teresa Castro Villaverde, nada en Noia fai 52 anos, exerce desde hai varios anos como doutora de atención primaria no centro de saúde de Vimianzo, traballo que compaxina coa súa gran afección, que é o deporte, concretamente o atletismo.
Teresa, protagonista do ciclo de charlas da FGA
A Federación Galega de Atletismo, continuará este venres co seu ciclo de charlas informativas en liña que deo comezo o pasado día 24 e onde se falou sobre as consecuencias económicas e os procesos administrativos que as novas lexislacións están a causar entre o tecido atlético.
Para este venres a segunda das charlas programadas ás 20.30 horas, no Facebook Live da Federación Galega de Atletismo será a que protagonice a atleta máster internacional, médica de atención primaria e membro da Xunta Directiva da FGA, Teresa Castro Villaverde.
A atleta e doutora galega falará sobre que tipo de medidas preventivas e hixiénicas adoptar ó sair a correr despois do confinamento. Da mesma maneira tamén poderemos escoitar as súas recomendacións dende o punto de vista médico, sanitario e deportivo sobre esta crise e onde todos e todas poderedes formular preguntas e participar a través do chat da aplicación.
