Teresa Portela segue a facer historia. Na súa estrea nos que son os seus sextos Xogos Olímpicos, a padexeira destacou na eliminatoria do K1 200, vencendo o pase directo ás semifinais.
Tal e como recollen desde a Real Federación Española de Piragüismo, a deportista declarou que “quero ir paso a paso. Agora pensar que mañá hai dúas semifinais, catro padexeiras pasan á final e iso é o que teño na miña cabeza. A partir de aí encantaríame soñar coa final, pero agora mesmo céntrome na semi e despois a seguir soñando”.
Portela domina as augas niponas
A olímpica galega competiu no Canal Sea Forest, converténdose na española con máis participacións olímpicas. Desde o principio da proba, a padexeira dominou sobre as augas niponas, cunha gran saída e demostrando a súa superioridade ata o final.
Portela rematou a eliminatoria cun tempo de 40.812, sendo a primeira clasificada. En segundo lugar quedou a húngara Karasz, mentres que a británica Kerr foi terceira.
Nas semifinais, a de Cangas deberá enfrontarse a grandes nomes como Carrington, bicampioa olímpica, Jorgensen, subcampioa olímpica e Walczykiewicz, subcampioa olímpica.
As impresións dunha padexeira histórica
En declaracións á Federación, a deportista asegura que nuns Xogos Olímpicos “prima todo, evidentemente hai que estar moi ben fisicamente, e forte no aspecto mental. Estar aquí é moi grande e fai falta todo”.
Portela: “Estar aquí é moi grande e fai falta todo”
A pontevedresa asegurou estar contenta “co resultado da eliminatoria; atopeime moi ben toda a regata. Estou levando moi ben a calor. Agora toca descansar con tanquilidade, e a pensar mañá na semifinal”.
Esta non era a primeira vez de Portela no canal toquiota. A deportista xa estreara a pista hai dous anos, na proba organiada para testar o canal. Isto foi unha vantaxe, xa que “xa sabía como era, pero ao final o vento non sempre sopla igual, e cada pista chegado o día é un mundo. Estivo ben ter vido e coñezo a zona, pero non é decisivo telo feito, hai compañeiras que non o fixeron e tamén estiveron ben”.
Teresa Portela agarda a Teresa Portela na semifinal do K1 200
