Tere Abelleira está sen equipo e o Dépor ABANCA podería estar negociando a súa volta ao conxunto branquiazul. Segundo informaba a Radio Galega a centrocampista pontevedresa, campioa do mundo coa Selección Española de fútbol feminino, podería estar en conversas co club herculino.
Na presentación de Marisa García, como xogadora do club herculino, o director deportivo do Dépor ABANCA, Kevin Cabado, foi preguntado polo interese da entidade coruñesa na fichexe de Tere Abelleira. Ao que respondeu: “É unha xogadora sobre a que o Dépor sempre preguntou pola súa situación, estivo preto, non só este ano, se non desde que saíu de aquí. A día de hoxe non hai máis ca iso”.
Kevin Cabado, director deportivo do Dépor ABANCA: “O Dépor preguntou pola situación de Tere Abelleira non só este ano, se non desde que saíu de aquí. A día de hoxe non hai máis ca iso”
De frutificar esa fichaxe, sería o reforzo estrela das Nosas deportivistas. Constituiría o retorno dunha futbolista que xa brillou defendendo as súas cores. Tanto que chamou a atención do club merengue que a fichaba xusto despois da primeira tempada das galegas á elite do futfem estatal cando o equipo galego sorprendeu cun fútbol brillante atrevido e ofensivo que levo ao equipo adestrado por Manu Sánchez a rematar o curso como cuarto clasificado.
A futbolista Tere Abelleira vén de finalizar a súa relación co Real Madrid segundo ela mesma manifestaba nas súas redes sociais o pasado 13 de xuño. “Sinto ter estado tan ausente, foron meses realmente duros, xa que este ano tocoume vivir a cara mala do fútbol en diferentes sentidos. Logo de varios malentendidos, chegamos a esta despedida, non era o que pretendía. Pero a vida, ás veces, ensinache outros camiños e haina que escoitar. Marcho logo de seis anos intensos e de grande crecemento persoal, marcho tranquila, tendo desfrutado e aprendido de cada momento”, publicaba a futbolista.
Ver esta publicación en Instagram
Un día antes, o 12 de xuño, o Real Madrid dicía adeus á xogadora cun vídeo coas súas mellores xogadas e un simple #GraciasTeresa.
Ver esta publicación en Instagram
Logo de anos de éxitos e crecemento como futbolista, as cousas torcíanse para Tere Abelleira en febreiro de 2025. Foi durante un adestramento coa Selección Española de fútbol feminino, en Wembley, cando a Roja preparaba un cruce contra Inglaterra na Liga de Nacións. Titular co Real Madrid, campioa do mundo con España, e de repente todo tornaba gris e complicado para a deportista froito dunha complicada lesión.
Tere Abelleira rompía o ligamento cruzado anterior (LCA) e tiña tamén tocado o menisco externo do seu xeonllo esquerdo. Pintaba mal. E foi mal. A futbolista de Pontevedra tivo que pasar por quirófano. Perdeuse a Eurocopa de 2025 e xa non volveu a xogar máis minutos co Real Madrid en partido oficial.
Ver esta publicación en Instagram
Regresou aos adestramentos en Valdebevas a finais do mes de marzo. Máis dun ano despois de caer lesionada. Pero o retorno ao traballo co grupo non supuxo a súa volta aos terreos de xogo vestindo a camiseta branca en partido oficial.
Brighton, Atlético, Juventus e Dépor ABANCA, clubs interesados en Tere Abelleira
Aínda que todo indica que está recuperada, obviamente a deportista galega estaría falta de ritmo competitivo logo de tanto tempo se xogar. Pero a súa calidade é de sobra coñecidad no fútbol estatal e internacional. Por iso, fálase de que conxuntos como a Juventus, o Atlético de Madrid ou o Brighton teríanse interesado pola fichaxe da centrocampista galega.
A lista de aspitantes a contar con todo o fútbol que leva na súas botas súmaríase agora, segundo informou a Radio Galega, o Dépor ABANCA, onde xa militou e desde onde marchou para o Real Madrid.
Ver esta publicación en Instagram
O conxunto galego milita na Liga F e suporía para Abelleira a oportunidade de ter protagonismo nun club que xoga na máxima categoría do fútbol feminino español, pero sen presións excesivas. Tería o chance de liderar e de volver á tranquilidade dun club no que estaría certa de sentirse querida, respectada e arroupada pola afección e a entidade. Unha volta a casa en toda regra. Como reza o dito “como en casa non se está en ningures”.
Dépor ABANCA e Tere Abelleira medraron xuntos
No xérmolo do Dépor ABANCA, aló polo 2016 estaba unha Teresa Abelleira moza e prometedora. Xuntos, Dépor e Teresa, medraron dentro do campo ata que o conxunto galego ascendía á máxima categoría do fútbol feminino estatal.
Foi tal o xogo que fixo o conxunto que adestraba Manu Sánchez no seu primeiro ano na máxima categoría que moitas das súas xogadoras remataron deixando as filas deportivistas ao recibir ofertas de clubs importantes.
Aquel curso 2019-20 o conxunto coruñés remataba cuarto sendo o equipo revelación. Namoraba o seu fútbol por moitas cousas, pola claridade de ideas, pola visión de xogo de futbolistas como a propia Teresa Abelleira, pola verticalidade doutras como Athenea del Castillo. Pero sobre todo por que o bloque funcionaba perfectamente engrasado baixo da batuta do técnico coruñés Manu Sánchez.
Aquela tempada o Real Madrid non só levou do Dépor ABANCA a Tere Abelleira, tamén fichou á cancerbeira canaria Misa. Ao ano seguinte seguiría o mesmo camiño a dianteira cántabra Athenea del Castillo.
O Dépor ABANCA descendía esa tempada logo da desfeita de tanta marcha de xogadoras. Ás xa citadas sumáranse outras tamén importantes no esquema de Manu Sánchez como María Méndez ou Nuria Rábano. O descenso foi un duro golpe para as galegas que tan só un ano antes estaban tratando de ti a ti aos mellores equipos da Liga.
De Madrid ao ceo
Unha vez no Real Madrid, Tere Abelleira adaptouse á perfección ao conxunto merengue. Fíxose tamén un oco na Selección Española de fútbol feminino. Tanto que foi parte do equipo que se proclamou campión do Mundo no 2023 e co combinado estatal gañou a Liga de Nacións no 2024. Loitou polo bronce nos Xogos Olímpicos de París pero a sorte foille esquiva nesa ocasión.
No horizonte da carreira deportiva da pontevedresa está volver a recuperar o seu brillo sobre o tepe, coller ritmo de xogo e mandar outra vez no centro do campo. Iso sería unha boa tarxeta de presentación para chegar con opcións de ser unha das futbolistas elixidas para competir coa Roja no vindeiro Mundial.
O Dépor ABANCA podería ser un club ideal para andar ese camiño. Está por ver se a pontevedresa ficha finalmente polo equipo galego e ponse ás ordes do arteixán Alberto Rodríguez, ou elixe algunha das outras opcións que tería sobre a mesa. O balón está nos seus pés. Dela é a decisión de cara a onde chutar a pelota.
