Nesta nova tempada da Liga Galega de División de Honra de waterpolo contará con dous equipos nun. O CW Pontevedra e o CW Pabellón Ourense chegaron a un acordo para fusionar os seus equipos na categoría absoluta e competir conxuntamente.
O pasado venres, 10 de setembro, José A. Tellería e Alejandro García, presidentes de ambas entidades, asinaron o acordo para o presente curso. En palabras do primeiro, o obxectivo deste convenio é “axudarnos uns aos outros e tirar do waterpolo feminino para arriba”.
Consecuencias positivas da pandemia
Na pasada campaña, a COVID-19 complicou os plans deportivos de ambos equipos. En Pontevedra, o club decidiu non competir, e en Ourense o conxunto apuntouse á competición de liga e copa, pero quedou cun número reducido de xogadoras.
Ante esta situación, García chamou a Tellería para consultarlle a posibilidade de que as rapazas pontevedresas competiran coas ourensás. “Aceptaron e xogaron algúns partidos con elas en Ourense. Tanto elas como nós íamos ter un problema de cantidade de rapazas para ter dous equipos máis ou menos completos e compensados e que non tiveramos problemas para competir, entón pensamos nalgún tipo de colaboración. Este foi o xerme de todo isto”, explica o presidente do CW Pontevedra.
Equipo feminino para os partidos e os adestramentos
A primeira toma de contacto foi hai cousa dunha semana, o venres 10. Neste primeiro adestramento, “só a posibilidade de poder facer un adestramento e xogar un partido só de rapazas de 7 contra 7, e mesmo nun adestramento era algo imepnsable, elas na vida o fixeran”, recalca Tellería.
No CW Pontevedra as xogadoras dos equipos femininos estaban acostumadas a adestrar en grupos mixtos e con distintas categorías, pero a partir de agora xa poderán compartir piscina con rapazas do seu nivel.
José Tellería (CW Pontevedra): “Este ano xuntando ás nosas e a elas, podemos ter un equipo de verdade, cun nivel, unha idade e unha experiencia”
“Ao final isto é bo para todos ao ter un grupo amplo e máis homoxéneo. Nós estes anos atrás, que viñamos gañando ligas e copas en Galicia, tiñamos unha base moi forte, un equipo titular moi forte, pero cando tirabamos do banco notábase un cambio moi grande. Este ano xuntando ás nosas e a elas, podemos ter un equipo de verdade, cun nivel, unha idade e unha experiencia”, subliña o presidente.
Tal e como sinala, a posibilidade de ter un grupo así de completo, “tanto para os partidos como para os adestramentos”, permite dar “un salto de calidade ao equipo”, xa que “estar adestrando con xente que che pon as cousas difíciles nótase”.
Pontevedra, sede do novo equipo
Para esta nova tempada, Pontevedra será a sede habitual deste novo equipo e dará o nome ao conxunto. “Barallamos varias ideas, non sabiamos se fundar un club novo e darlle unha denominación nova, se facer un novo nome con Pontevedra-Ourense, pero bueno, iso a nivel federativo ten certas complicacións”, expón o responsable.
Por iso, finalmente ambas directivas decantáronse por xogar en terreo pontevedrés. “Como o ano pasado xogamos como Pabellón Ourense con xogadoras do CW Pontevedra, este ano xogamos como CW Pontevedra con xogadoras do Pabellón Ourense“, resume.
Tellería: “Se non podemos xogar en Pontevedra sabemos que temos a posibilidade de xogar en Ourense. A eles tamén lles interesa xogar algúns partidos alí para poder traballar o tema da promoción”
Así, a meirande parte dos encontros que xoguen como locais serán á beira do Lérez, dispoñendo da piscina ourensá cando sexa preciso. “No CGTD estamos de prestado e podemos dispoñer cando hai sitio e cando non hai otras competicións. Se non podemos xogar en Pontevedra sabemos que temos a posibilidade de xogar en Ourense. A eles tamén lles interesa xogar algúns partidos alí para poder traballar o tema da promoción e captación das rapazas”, apunta Tellería.
Con vistas ao futuro
Este proxecto naceu coa idea de solucionar un problema a curto prazo, pero ningún dos clubs descarta amplialo. “Evidentemente vai depender moito de como se vaia dando esta tempada experimental, pero a idea é poder consolidar un proxecto e incluso se tiveramos a capacidade de gañar o campionato galego e poder ir a unha fase de ascenso nacional, para ir collendo experiencia e ir probando, o obxectivo a medio prazo sería intentar conseguir un ascenso a unha categoría nacional e iso pasa por poder contar con todo o bloque”.
Tellería: “O obxectivo a medio prazo sería intentar conseguir un ascenso a unha categoría nacional e iso pasa por poder contar con todo o bloque”
Nesta liña, en ambos equipos pensan preparar o seu particular “ciclo olímpico”, mantendo este proxecto tres ou catro anos. “Non imos dicir que o proxecto é bo ou malo só por unha tempada, imos darlles voo e ver como evoluciona a cousa”, apunta o presidente do CW Pontevedra.
