- O gañador do Raid Gallaecia completou o percorrido de 185 quilómetros combinando trekking, bicicleta de montaña, kaiak, rápel e orientación polo territorio Mariñas Coruñesas e Terras do Mandeo en 18 horas, 25 minutos e 36 segundos.
- Acompañaron no podio ao conxunto francés dous equipos galegos, o Brigantia Adventure Race (segundos), e o Endurance (terceiros).
O Team FMR francés proclamouse campión do Raid Gallaecia – Campionato de Europa de carreiras de aventura 2022 en Betanzos. O conxunto galo cruzou a liña de meta situada na Praza Irmáns García Naveira pasadas as 4:30 horas do domingo despois de 185 quilómetros combinando trekking, bicicleta de montaña, kaiak, rápel e orientación polo territorio da Reserva da Biosfera Mariñas Coruñesas e Terras do Mandeo.
O cuarteto integrado por Julien Moncomble, Clement Coulon, Benjamin Coutand e Lucie Croissant cubriu a distancia nun tempo total de 18 horas, 25 minutos e 36 segundos, con media hora de adianto sobre a previsión máis optimista da organización. O premio para os gañadores é un billete para o Campionato do Mundo 2023 de Sudáfrica e catro unidades do reloxo multideporte Enduro 2 de Garmin.
Dous equipos galegos completaron o podio continental en Betanzos: o Brigantia Adventure Race, que cruzou a liña de meta na Praza Irmáns García Naveira a 21 minutos do FMR, e o Endurance, terceiro a 35 minutos, unha escasa marxe para unha proba de resistencia ‘non-stop’ na que participaron 54 equipos e 182 deportistas de 7 países diferentes.
A saída deuse o sábado ás 10:00 horas desde a Praza Irmáns García Naveira despois da entrega de mapas, elemento básico nas carreiras de aventura. Os participantes debían trazar o percorrido e axudarse cun compás para pasar polas balizas que a organización situou sobre o terreo. Os dispositivos de navegación con GPS estaban terminantemente prohibidos.
A primeira sección, un trekking de 22 quilómetros, levou aos equipos ata a praia do Pedrido para empezar o sector de kaiak, un traxecto de 21km de ida e volta pola Ría de Betanzos pasando pola praia de Gandarío, a Illa Carboeira e a praia de Miño antes de desembarcar no porto de Betanzos, onde xa se destacaron os dous principais protagonistas da carreira: o Brigantia e o FMR, separados por só cinco minutos.
Os líderes accederon á cidade pola porta a da ponte nova e afrontaron a proba especial de rápel, na que un integrante de cada equipo descendeu a Torre do Reloxo antes de montarse por primeira vez nas bicicletas para cubrir 32km en dirección a Oza dos Ríos, lugar habilitado para a terceira zona de transición. Mentres o Brigantia Adventure Race dobrou a súa vantaxe sobre o FMR, o Endurance afianzouse na terceira posición, moi preto dos franceses.
A seguinte sección foi clave no desenvolvemento da proba: un trekking de 29km e 1.200m de desnivel positivo coas subidas ao Monte do Gato e o Pico Felgar (con 503m de altitude o punto máis elevado do roteiro). Nas últimas horas de sol e precisamente na ascensión ao Felgar, o FMR deu caza ao Brigantia e, xa en terreo descendente, protagonizou algúns dos grandes movementos de orientación da carreira.
Despois de picar a baliza 64 volveu varios quilómetros sobre os seus pasos para atallar pola Finca O Castelo ata o punto de control 65, unha elección de percorrido diferente ao trazado ideado pola organización. A xogada saíulle ben, pero non o suficiente para distanciarse cos seus perseguidores, Brigantia Adventure Race (2º) e Endurance (3º).
A diferenza axustouse aínda máis entre os dous primeiros tras o 20km de bicicleta para volver a Betanzos. Apertouse tanto que Brigantia Adventure Race, outra vez na cabeza, e FMR realizaron practicamente á vez a antepenúltima transición na Praza Irmáns García Naveira. Tras o rexistro pertinente e unha ollada rápida aos mapas, os dous líderes partiron cara ao encoro de Beche con 26km de bicicleta por diante.
O conxunto do Endurance volveu reducir a súa desvantaxe e os tres primeiros clasificados empezaron a penúltima sección separados por só sete minutos: un trekking de 7 quilómetros na disciplina de score, específica de orientación e que permite pasar polos puntos de control sen orde lineal.
Entraba en xogo a estratexia e aí destacouse o FMR, que no último sector, 28km de bicicleta para regresar a Betanzos, afianzou o seu liderado cun ritmo altísimo.
O cuarteto francés, 7º no ultimo Campionato do Mundo tamén celebrado en Galicia e gañador da recente proba das Series Europeas en Graal (Suíza), xa é o primeiro campión de Europa das ARWS (Series Mundiais polas súas siglas en inglés). O Raid Gallaecia tamén acolleu a cuarta proba da liga Española de Raids de Aventura e a quinta manga da liga Galega de Raids nas categorías Elite, Aventura e Orientaraid.
So sete dos 54 equipos foron quen de completar o percorido do Raid Gallaecia
Dos 54 equipos participantes nesta edición do Raid Gallaecia – Campionato de Europa de carreiras de aventura 2022 que contou con saída e chegada no Concello de Betanzos só sete non completaron o percorrido. A meta pechouse ás 13:30 horas e, posteriormente, procedeuse á entrega de premios.
Consulta aquí os resultado do Raid Gallaecia – Campionato de Europa de Carreiras de Aventura 2022
Segundo indica a organización, asistiron á cerimonia de entrega de premios desta competición continental María Barral, alcaldesa do Concello de Betanzos, Bernardo Fernández, deputado provincial da Deputación da Coruña, Andrés Hermida, concelleiro de Urbanismo, Centro histórico, Patrimonio, Educación e Deporte do Concello de Betanzos, José Antonio Santiso, presidente da Reserva da Biosfera Mariñas Coruñesas e Terras do Mandeo, Francisco Cobas, presidente da Federación Española de Orientación, e Javier Alvelo, presidente da Federación Galega de Orientación.
Ver esta publicación en Instagram
