A primeira e segunda xornada do Open de Turquía de taekwondo saldouse con grandes resultados para o deporte galego. En categoría feminina, Tania Castiñeira volveu cunha prata colgada e en masculina Iván García acadaba un ouro.
A deportista galega, que compite co club Hebe, sumou a súa segunda medalla en cuestión de días. Tania Castiñeira comezou o torneo contra a turca Ece Nur Akkoyunlu e o fixo de forma absolutamente contundente: 21-1 para a galega.
Xa en cuartos, novamente unha turca, Mervenur Euci, foi a rival de Castiñeira, nun combate complicado a priori, que finalizou con triunfo cómodo da nosa. Na semifinal, Tania tivo enfronte á austriaca Marlene Jahl, e ambas ofreceron unha loita espectacular, cun enorme esforzo físico, e vitoria para a de Moaña, que logrou así o pase á final.
E na final atopouse cun vella coñecida, a iraní Zahra Pouresmaeil, a cal logrou o ouro a pesar do enorme esforzo que fixo a nosa deportista. Prata para Tania Castiñeira, que suma outro metal en menos dunha semana.
En redes sociais, Tania Castiñeira expresou a súa alegría polos grandes resultados que está a colleitar, malia ter pasado tempo lonxe do tapiz.
Ver esta publicación en Instagram
No Open de Turquía tamén competiron os galegos Manu Parada (-68, Natural Sport) logrando a medalla de prata, e Pablo Patiño (-68, Patiño) foi bronce.
Outro para Iván García +87
Na segunda xornada deste Open de Turquía de taewondo, a boa nova chegaba da man de Iván García (+87, Mat´s). O deportista galego acadou a medalla de ouro tras vencer en catro combates e ante rivais de moita entidade.
A competición de Iván García comezou ante o turco Muhammet Cetinkaya, ao que superou con bastante facilidade, nun combate sinxelo para o noso deportista. En segunda rolda tiña un rival moi complicado, Anthony Mylann Obame, subcampión olímpico en Londres e medallista mundial, pero Iván dominou o intenso combate en todo momento e logrou un importante triunfo que xa o colocou na semifinal. E novamente outro taekwondista duro: O polaco Mikolaj Szaferski, que gañara ao noso deportista en Alemaña o pasado ano. Pero esta vez non foi así. O deportista do Mat´s xa o coñecía e soubo como enfrontalo e venceu por 18-10.
Así, con ese magnífico percorrido, plantouse na final onde esperaba Radik Isaev, ouro olímpico en Río e campión do mundo. Foi un combate moi completo, tenso e súper emocionante ante un rival de semellante calidade, pero novamente Iván García soubo ler perfectamente ao rival e logrou así unha vitoria moi importante (15-10).
Con este ouro no Open de Turquía, o galego Iván García completa unha xira espectacular (prata en Sofía e ouro en Turquía) e suma 16 puntos no ránking mundial, ademais dunha gran experiencia xa que se enfrontou a varios olímpicos de moito nivel.
Arlet Ortiz tivo que deixar a competición ao dar positivo en COVID-19
A noticia negativa chegou coa galega Arlet Ortiz, que “despois de superar dúas roldas e cando ía a disputar os cuartos, tivo que abandonar en medio da competición, ao comunicarlle a organización que dera positivo en COVID-19″, explican desde a Federación Galega de Taekwondo.
“Todos os deportistas pasan por unha proba PCR o día antes da competición, pero o protocolo non funcionou correctamente, ao comunicar o resultado cando a deportista xa estaba en medio da competición. Agora Arlet, que está en perfectas condicións físicas, terá que quedarse confinada ata que a PCR dea negativo e poida saír e regresar a casa”, segundo informa desde a Federación Galega de Taekwondo.
