Tania Castiñeira (+73, Hebe) e Helena García (-73, Dobok) proclamáronse campioas de España en La Nucía (Alacante). Estes foron os resultados máis destacados para Galicia no Campionato de España Absoluto de Combate xunto con catro pratas o seis bronces, que permitiron a Galicia lograr a segunda posición por equipos na clasificación xeral e na categoría feminina, tal e como informa a Federación Galega de Taekwondo.
Tania Castiñeira, repite
Tania Castiñeira logrou o cuarto título de campioa de España absoluta de forma consecutiva, cunha actuación case perfecta. A taekwondista do Hebe fixo tres combates e nos tres venceu en dous asaltos. En primeira rolda enfrontouse a Soraya Martín (Euskadi) e foi moi superior para lograr o pase as semifinais onde esperaba a galega Desiree Rivadulla, que viña de superar á catalá Silvia Boix e garantir a medalla de bronce.
Tania Castiñeira venceu a Desiree Rivadulla e plantouse na final onde loitou ante Violeta Pérez (Euskadi). Outra vez, con moita seguridade e concentración, Tania Castiñeira gañou para confirmar así o número 1 do ranking español no seu peso.
E pasamos dunha deportista xa de garantías, a unha promesa de 16 anos que non deixa de medrar con grandes pasos. O segundo ouro galego foi para Helena García (-73, Dobok), que sorprendeu a todos ao impoñerse no Campionato de España absoluto, na súa primeira experiencia.
Comezou a competición ante a representante de Euskadi Ane Vallo, nun combate no que se impuxo a galega por 2-0. Despois enfrontouse a Leyre Zugazaga (Castela a Mancha), con nova vitoria en dous asaltos. Na semifinal Helena García loitou contra Belén Morán (Andalucía), a número 1 do ranking español, que tiña unha man recentemente operada.
Foi un combate moi psicolóxico, pero Helena García volveu mostrar unha veteranía e tranquilidade pouco habitual coa súa idade e gañou en dous asaltos. O campionato finalizou ante Carlota Zanoni (Catalunya), nun combate que se resolveu en tres asaltos. No primeiro impúxose a catalá (2-2, por rexistro) e nos dous seguintes a galega (4-2 e 12-2). Ouro para Helena García!
As pratas foron para Arlet Ortiz (-47, Mat´s), Alma Pérez (-53, Suh Sport), Samuel Meilán (-58, Tao) e Sergio Troitiño (-87, Mat´s). Arlet Ortiz, que defendía o título de campioa de España, arrancou o Campionato en primeira rolda fronte a Elsa Hernández (Castela a Mancha). Venceu a galega con claridade e pasou a cuartos onde esperaba Andrea García (Extremadura). Novo triunfo contundente de Arlet Ortiz.
Na semifinal, ante Houda El Haddadi (Valencia), tivo máis problemas e foi unha loita axustada, pero con moita cabeza volveu vencer para meterse na final onde esperaba Luana Martón (Castela a Mancha). O título foise por moi pouco.
En -53 kilogramos, Alma Pérez tampouco puido revalidar o título, aínda que chegou ata a final, onde esperaba, coma sempre, Laura Rodríguez. Antes da gran final, a taekwondista do Suh Sport venceu con moita claridade a Ixone Fernández (Cantabria), Adela Campoy (Murcia) e Salma Khatiri (Murcia). No último combate, ante a súa gran rival do peso Laura Rodríguez (Castela a Mancha), escapouse o ouro, nunha loita tremendamente axustada que se decidiu por detalles. Alma Pérez gañou o primeiro asalto, Laura Rodríguez o segundo e o terceiro foi para a castelá por só un punto de diferenza.
Samuel Meilán (-58, Tao) foi outra das boas novas do torneo. O vigués, que aínda non cumpriu os 18 anos, sorprendeu no seu primeiro campionato de España sénior. Samuel Meilán gañou en primeira rolda a Echedey Tovar (Canarias) en dous asaltos e de forma cómoda. Posteriormente enfrontouse a Ignacio Soriano (Aragón) e novo triunfo en dous asaltos para o taekwondista do Tao, que logrou así o pase as semifinais onde esperaba o representante de Estremadura, Oussama Guedzi. Este foi un pouco máis complicado para o noso representante, xa que perdeu o primeiro asalto e tocou remontar e vencer nos dous seguintes para meterse así na gran final.
Neste último combate esperaba Adrián Vicente, campión de Europa e olímpico, que partía como gran favorito, e non defraudou. Adrián Vicente foi mellor e venceu en dous asaltos, para acadar o título de campión de España, mentres que noso Samu é subcampión cun enorme mérito.
Outro dos novos que nos deu unha gran alegría foi Sergio Troitiño (-87, Mat´s), que se proclamou tamén subcampión de España. Venceu nos cuartos a Lluis Mas (Andalucía) en dous asaltos e con marcadores amplos. Na semifinal loitou contra Raul Corredor (Madrid) e novamente vitoria do galego en dous asaltos e con claridade. Na final enfrontouse ao vixente campión de España e olímpico Raul Martínez (Comunidade Valenciana). Sergio Troitiño plantou cara e aínda que perdeu en dous asaltos (o segundo por rexistros) competiu ao máis alto nivel e lle puxo as cousas moi difíciles a Raúl Martínez.
Imos cos bronces, que foron para Desi Rivadulla (+73, Suh Sport), Sara Cortegoso (-46, Mace Sport), Miryam García (-62, Patiño), Alex Pazos (-58, Taekanart), Pablo Patiño (-68, Patiño) e Adrián Pan (-74, Mace Sport).
En -58, tivemos doblete galego, xa que tamén subiu ao podio Alex Pazos para recoller o bronce xunto a Samu Meilán (prata). Alex Pazos fixo un total de catro combates e conseguiu tres triunfos. Comezou gañando a José Antonio Rivera (Estremadura) e posteriormente ao catalán Allen Alarcón. Nos cuartos de final deu boa conta do valenciano Héctor Almudever e logrou así garantir o seu metal. Na semifinal enfrontouse ao potente e case inasequible Adrián Vicente e aí rematou a magnífica traxectoria do galego.
Pablo Patiño (-68, Patiño) logrou o bronce tras facer tres combates. No primeiro, vitoria sinxela en dous asaltos fronte a Aketza Unzueta (Euskadi) e nos cuartos eliminou a José Barranco (Andalucía) nun combate máis axustado, pero que tamén resolveu en dúas mangas. Na semifinal caeu derrotado ante Óscar Hernández (Castela a Mancha) nunha axustada loita (2-0).
Adrián Pan (-74, Mace Sport) acadou o bronce en – 74 quilogramos, tras gañar dous combates. No primeiro, ante o navarro Mahmud Mohamed-Salem, Adrián saíu un pouco desconcentrado e lle custou meterse. Así tocou remontar para impoñerse en tres asaltos. Nos cuartos entrou moi ben e venceu a Alejandro Pizarroso (Madrid) con bastante claridade (2-0). Caeu na semifinal ante Juan Antonio Milán (Murcia), que foi o que finalmente acadou o título de campión de España.
E na categoría feminina, Miryam García (-62, Patiño) logrou a medalla de bronce. A galega venceu na primeira eliminatoria a Paula Pizarroso (Madrid) en dous asaltos e no segundo tivo como rival a Ester Asensio de Catalunya, con nova vitoria para a nosa deportista en dous asaltos. Na semifinal tocou a rival máis dura, Jone Magdaleno (Euskadi) e a pesar de intentalo, a taekwondista do Patiño non puido coa vasca e caeu en dous asaltos. Bronce para Miryam García!
E rematamos co bronce de Sara Cortegoso en -46 quilogramos. A deportista do Mace Sport comezou a competición fronte a Ainara Rojas (Andalucía) e a pesar de ser un combate duro, a noso deportista resolveu en dous asaltos e con bastante distancia. Nos cuartos enfrontouse a Lluisa Garcies (Baleares) e triunfo da galega nun combate moi duro e disputado que se decidiu en tres asaltos. O terceiro e definitivo caeu a favor de Sara nos últimos segundos.
Na semifinal, Sara Cortegoso enfrontouse a Sofía García Marquina (Castela a Mancha), que foi a campioa de España finalmente. Sara Cortegoso loitou ata o final nun combate moi fermoso, en tres mangas, e cheo de
emoción.
