As deportistas galegas Tania Castiñeira (Hebe) e Arlet Ortiz (Mat´s) proclamáronse onte en Córdoba campioas da Copa Iberdrola de taekwondo 2022, unha competición feminina de pesos olímpicos, na que se enfrontan as dúas primeiras clasificadas dos rankings nacionais.
Así, participaron cinco taekwondistas galegas, proba do gran momento do taekwondo galego feminino. En -57 quilogramos competiron Alma Pérez (Suh Sport) e Arlet Ortiz (Mat´s), mentres que en -67 as galegas clasificadas foron Miryam García (Patiño) e Ainhoa García (Couto) e Tania Castiñeira (Hebe) participou en +67 quilogramos. Ademais, en Córdoba, tamén estivo o adestrador do CGTD, Jesús Benito.
Tania Castiñeira tivo unha actuación contundente para proclamarse gañadora do seu peso. Na semifinal superou a Carlota Zanoni, compañeira do CAR, en dous asaltos e posteriormente, na final, gañou a Belén Morán, a súa principal rival no seu peso nos últimos anos, tamén por 2-0. Vitoria clara e tremendamente satisfactoria da nosa deportista que pechou así un gran ano.
Pola súa banda, en -67 quilogramos impúxose Arlet Ortiz, aínda que con máis sufrimento. Arlet Ortiz superou na semifinal a Laura Rodríguez (Castela a Mancha) por 2-1, nun combate moi fermoso e loitado, e na final venceu tamén por 2-1 a Marta Calvo, tamén de Castilla La Mancha. Neste peso tamén contamos coa participación de Alma Pérez (Suh Sport), que rematou cuarta clasificada tras perder os dous combates. Na semifinal plantou cara duramente ante Marta Calvo, pero finalmente o combate caeu a favor de Marta Calvo por 2-1. Na final de consolación, Alma Pérez comezou moi mal e perdeu por un claro 2-0 ante Laura Rodríguez.
E rematamos coa participación galega en -67 quilogramos. Miryam García (Patiño) foi terceira clasificada tras perder na semifinal ante Cecilia Castro (medallista mundial en Guadalajara) por 2-0 e vencer no segundo combate á Ainhoa García tamén en dous asaltos. Ainhoa García perdera con anterioridade na semifinal ante Jone Magdaleno (nº 1 de -62 quilogramos) por 2-0, segundo informa a Federación Galega de Taekwondo.
