Sofía Alejandra Florentín (Laferrer – La Matanza – Buenos Aires, 29/05/1997), coñecida deportivamente como Tana é a primeira incorporación do Viaxes Amarelle FSF de cara a segunda fase da competición da Primeira RFEF Futsal Feminino, na que o conxunto coruñés xogará por evitar o descenso. A xogadora, internacional coa selección Arxentina desde o ano 2017, dá o salto á competición europea da man do cadro herculino, na súa loita pola permanencia na elite do fútbol sala feminino español.
A pesar de que o club, tiña pechada a contratación da internacional arxentina desde o pasado mes de xaneiro, a súa chegada non se puido materializar até este domingo 21 de marzo, que aterrou na cidade da Coruña. “As dificultades sanitarias que vivimos actualmente están a provocar numerosos atrasos en trámites que habitualmente son máis áxiles”, explica o cadro galego.
Durante a xornada do luns Tana pasou o pertinente recoñecemento médico, previo ao comezo da actividade deportiva de competición. E tamén acudiu á tenda de Legea para probar as tallas de equipamentos e roupa de paseo.
As circunstancias impediron que puidese coñecer ao resto das persoas que conforman o equipo do Viaxes Amarelle persoalmente, posto que, debido á detección dun positivo por COVID-19, a plantilla atópase confinada até o domingo, e non poderá retomar os adestramentos até o luns 29 de marzo.
A traxectoria deportiva de Tana
Sofía Florentín Tana, con 23 anos, ten un historial no que pasou polos equipos arxentinos de San Lorenzo (2013-2014), River Plate (2014-2017), All Boys (2017), Kimberley (2017-2020) e a súa última etapa dispútoa no ano 2020 no Racing Club.
Ademais, a xogadora arxentina forma parte do combinado da selección arxentina desde o ano 2017, onde conseguiron a medalla de bronce na Copa América. No ano 2018 participo coa selección nos Xogos Odesur e na edición da Copa América do ano 2019, con sede en Chile, as arxentinas conseguiron a medalla de Prata, tras caer na final fronte á selección brasileira.
Como xogadora de Kimberley conseguiu os títulos de Supercopa do ano 2018 e 2019, así como o Torneo local de 2018 e 2019, mentres que foron Bronce na Copa Liberadores de 2019.
“A internacional arxentina móvese nas posicións de á e peche. É destra, e gústalle saír xogando co balón e resolver en espazos reducidos. A todo iso, acompáñalle potente disparo exterior”, explican desde o Viaxes Amarelle FSF.
Desde o club coruñés queren agradecer “o interese de Sofía Florentín por incorporarse a un equipo novo e que lle gusta traballar. Xuntos buscarán crecer para conseguir o obxectivo da permanencia do Viaxes Amarelle FSF na Primeira División da fútbol Sala Feminino da Real Federación Española de Fútbol“.
