Támara Echegoyen é un deses nomes que soan aínda que non sexas seguidor da vela ou do deporte feminino, en xeral.
Ser unha veterana dos deportes náuticos (leva desde os 5 anos subida a unha embarcación), pasar por diferentes modalidades ao longo da súa carreira deportiva e, sobre todo, o seu extenso palmarés fíxolle acadar unha sona incluso entre aquelas persoas alleas ao mundo da vela. Polo menos entre as galegas.
Conseguiu Ouro Olímpico nos Xogos de Londres 2012, diplomas (4º posto) en Río 2016 e Tokio 2020, pero ademais é campioa de Europa en clase Elliot 6m, campioa do mundo March Race, dúas veces campioa do Mundo 49erFX e outras dúas bronce europeo en 49erFX.
Agora, con 40 anos, afronta os que serán os seus cuartos Xogos Olímpicos da man da que é moito máis cunha compañeira: Paula Barceló.
Parece que a diferenza de idade non fai dano na relación entre estas dúas deportistas e a conexión entre elas pódese ver en calquera das súas intervencións públicas.
Xuntas enfrontaranse de novo a uns Xogos coa intención de subir ao podio.
Echegoyen, abandeirada de España
Paixón, ambición, esforzo e positivismo poderían ser algunhas das palabras que definan a esta ourensá de nacemento. E pode que por eses valores que transmite a través das cámaras e da súa experiencia fose elixida como abandeirada española nestes Xogos de París 2024. Farao xunto a Marcus Cooper, campión olímpico en piragüismo.
De feito, o que máis nos gusta de Tamara Echegoyen, sen dúbida, é o seu carácter. Sempre cun sorriso na cara atende a calquera xornalista de bo grado. Sabe o que supón (para ben e para mal) ser obxectivo da prensa só puntualmente coa chegada das competicións internacionais, pero os anos de experiencia permítenlle soportalo e transformalo no seu beneficio.
Por todo isto e moito máis, Támara Echegoyen é unha de As Nosas.
