A xogadora internacional Tamara Abalde anuncia a súa retirada do baloncesto profesional. Unha lesión no ombreiro leva á deportista galega a tomar esta decisión aos 34 anos con preto de 20 de exitosa traxectoria deportiva.
Na súa conta en instagram a xogadora de baloncesto galega explicaba: “Foi unha aventura marabillosa, case 20 anos de carreira profesional, infinitas horas de adestramentos, partidos, viaxes e momentos inesquecibles. Experiencias que me converteron na persoa que son hoxe. Só me sae dar as grazas”, manifestaba.
Tamara Abalde explicaba na súa despedida que “non podería nomear un a un a todos os que me acompañastes durante todos estes anos, pero sei que vós sabedes quen sodes: o máis valioso que me levo da miña carreira son as persoas que se cruzaron no meu camiño, e que se converteron en amizades para toda a vida”.
Ver esta publicación en Instagram
A deportista galega agradecía a “a todos os clubs polos que pasei, tiven a sorte de xogar en moitos equipos, vivir en moitas cidades e gozar de moitas afeccións, e de todos eles lévome miles de recordos no corazón”. Pero tiña unha “mención especial á Selección Española”. Tal e como declaraba a internacional galega, a Selección Española de baloncesto foi “un dos meus maiores orgullos é ter a honra de representar ao meu país e formar parte dese equipo, que é unha familia. Por último, grazas á miña familia por acompañarme, animarme e estar sempre”.
Tamara Abalde miraba cara ao futuro na publicación na que comunicaba o seu adeus ao exercicio do deporte profesional explicando: “Síntome tremendamente afortunada e orgullosa de pechar unha etapa tan incrible, e moi ilusionada diante o novo camiño que comezo”.
Unha lesión no ombreiro fíxoa pasar por quirófano en 2022 logo dunha “tempada nada doada”, como ela mesma manifestaba na súa conta de instagram en abril de 2022.
Ver esta publicación en Instagram
A traxectoria de Tamara Abalde
Na súa posición de á-pívot Tamara Abalde xogou, durante dúas décadas en activo no básket profesional, en conxuntos da Liga Femenina da Federación Española de Baloncesto (FEB) como o Celta Baloncesto, Rivas Ecópolis, Unión Navarra Basket, CB Avenida, Cadí La Seu, CREF, Mann Filter ou o Valencia Basket, Araski. Tamén estivo na NCAA competindo co Lamar University ou na liga francesa en clubs como Pays d´Aix Basket ou Basket Landes.
O seu último destino foi o Durán Maquinaria Ensino de Lugo. A elástica do club lucense é a derradeira camiseta que defendeu a deportista ferrolá, formada na canteira viguesa.
A galega Tamara Abalde participou con España nos Xogos Olímpicos de Toquio 2020, onde España acadou un diploma. O equipo vermello foi eliminado en cuartos de final con dúas galegas nas súas filas, Abalde e Raquel Carrera. Tamén coa Selección Española, Tamara foi campioa do Eurobasket 2019, bronce no de 2009 e campioa no Europeo Sub-16 nas edicións de 2004-2005-2006.
A xogadora galega forma parte dunha familia de deportistas ligados ao baloncesto. É filla do vigués Alberto Abalde Rodríguez que xogou como alero en clubs como o Santa Clara Vigo, Obradoiro, OAR Ferrol ou Concello de Meis. A saga continou con Tamara e o seu irmá, o tamén baloncestista Alberto Abalde Díaz, que comparte con ela a condición xogador internacional coa Selección Española de baloncesto.
Os dous irmás Abalde estiveron con España disputando os Xogos Olímpicos de Toquio 2020. Actualmente Alberto Abalde xoga na ACB nas filas do Real Madrid como alero.
