Tamara Abalde e Raquel Carrera, estarán en Toquio 2021

Na ducia de xogadoras elixidas polo seleccionador español, Lucas Mondelo, hai dúas galegas: Tamara Abalde(Durán Maquinaria Ensino) eRaquel Cabrera(Valencia Básket). Ambas as dúas estarán nos Xogos Olímpicos de Toquio 2021. Como contrapunto, cáese da lista a galega Paula Ginzo , xunto con Laura Quevedo, as dúas que seguirán adestrando co grupo até o día 15.

Segundo informa a FEB (Federación Española de Baloncesto), a quince días do primeiro partido para o inicio dos Xogos Olímpicos, Lucas Mondelo e o seu corpo técnico definiron os nomes das 12 xogadoras que representarán a España en Toquio 2021.

As xogadoras que formarán o equipo son Silvia Domínguez, Cris Ouviña, Laia Palau, Maite Cazorla, Queralt Casas, Leo Rodríguez, María Conde, Alba Torrens, Raquel Carreira, Laura Gil, Tamara Abalde e Astou Ndour, que se incorporará ao equipo de forma inminente.

O seleccionador destacou sobre Paula Ginzo e Laura Quevedo que as dúas xogadoras “formaron parte da Selección durante todo este verán, disputando o EuroBasket de Valencia, axudando ao equipo e rendendo ao máximo nivel”. Mondelo quixo resaltar a “gran profesionalidade mostrada e o bo traballo realizado por ambas as dúas deportistas”.

15 días para o debú da Selección con Tamara Abalde e Raquel Carrera

A Selección Feminina de baloncesto viaxará a Toquio o vindeiro sábado 17 de xullo. Antes, e ao longo dos próximos días, continuará en Madrid coa súa posta a punto para os que serán os quintos Xogos na historia da Feminina. “As xogadoras transmítenme moita enerxía e a pesar das baixas e as dificultades, seguimos crecendo día a día. Iremos a Toquio con ilusión. Teño esperanza no equipo”, indicou Mondelo.

España, prata olímpica en Río 2016, disputou dous partidos amigables de preparación ante Francia cun balance de 1/1: gañou o primeiro, celebrado en Málaga (72-61) e perdido o de París (80-75).