As vacacións de Semana Santa non serán tal para as xoves promesas do baloncesto español, xa que se reunirán nunha convocatoria en L’Alqueria de Valencia. As Seleccións U15, U16 e U18 reuniránse nunha concentración en modo burbulla entre o 31 de marzo e o 4 de abril.
Na que abrangue ás xogadoras menores de 15 anos, atópanse dúas representantes do baloncesto galego. Nacary Rojas, adestradora do Bosco Salesianos, forma parte do staff técnico e Irene Noya, galega que compite no Segle XXI, é unha das xogadoras que entra na lista de convocadas.
Nacary Rojas, acento galego no mando da Selección
A técnica Nacary Rojas adestra ao conxunto sénior do Bosco Salesiano ourensán e forma parte da Selección Galega desde a tempada 2016/2017 e da Española desde o verán do 2018.
Coñecedora do baloncesto galego desde dentro, a adestradora asegura que “en Galicia trabállase moi ben e hai moi bos adestradores/as e clubs con filosofías de traballo moi claras, querendo buscar a melloría de cada xogadora”. Por iso, non pon o foco en que xogadoras galegas como Irene Noya marchen a outros equipos a seguir medrando, se non que o que lle parece máis importante é “o crecemento da xogadora, non só deportivametne, senón poder ofrecérllo noutros ámbitos, sexan en Galicia ou noutra cidade”.
Nacary Rojas: “En Galicia trabállase moi ben e hai moi bos adestradores/as e clubs con filosofías de traballo moi claras”
Sobre a convocatoria de Semana Santa, da que formará parte no equipo U15, Rojas sinala que se levará a cabo con todas as medidas sanitarias e seguindo os protocolos habituais da FEB, cunha proba de antíxenos á entrada e á saída.
En relación á convocatoria, comenta que “hai unha responsable da xeración que é a encargada de coñecer ao maior número de xogadoras para poder facer a lista de convocadas”. Neste caso é Elena Lahoz, que se encarga da U12 á U15, polo que o papel de Rojas limítase a dirixir os adestramentos e realizar informes. Porén, recoñece que a situación actual de pandemia dificultou a elección, ao paralizarse moitos campionatos, torneos e as propias convocatorias de seleccións autonómicas.
O mecanismo para seguir de cerca ao talento emerxente no mundo do baloncesto é a Operación Talento, con concentracións como a desta Semana Santa para coñecer de preto ás xogadoras. Para as xoves baloncestistas este tipo de eventos supón “unha experiencia incrible”. En palabras de Rojas, serven para que coñezan “a nenas de toda España coa súa mesma paixón. Teñen á súa disposición a varios adestradores/as, corpos biomédicos, preparadores/as físicos, delegado/a, cousa que na maioría dos clubs non se pode dispoñer de tantas persoas para un equipo”.
Nacary Rojas: “Teño a sorte de poder traballar rodeada de grandes profesionais”
Das súas experiencias coas Seleccións destaca que é unha “afortunada”, xa que “teño a sorte de poder traballar rodeada de grandes profesionais. Ademais da aprendizaxe dos adestramentos, conversacións fóra da pista que xeran inquietudes para seguir crecendo”.
Irene Noya, promesa do baloncesto español
A baloncestista galega Irene Noya, natural de Vilagarcía, é unha das xoves promesas do baloncesto español. Con 15 anos, un dos clubs estrela na formación de xogadoras botoulle o ollo para ofrecerlle unha beca de 4 anos. Desde esta tempada 2020/2021, Noya forma parte do Segle XXI.
“Eu era unha persoa moi pechada para este tipo de oportunidades ao principio. O meu irmán coñecía Segle antes de que me chamaran e el foime metendo neste minimundo de Segle XXI. Cando me chamaron souben que era unha oportunidade que non podía perder e que tiña que aproveitar ao máximo os 4 anos de programa”, declara. Agora medra no recinto catalán, que inclúe un instituto, un polideportivo e unha residencia, ademais do Consell Català d’Esport.
O baloncesto é cousa de familia para ela. Tanto a súa nai como o seu tío practicaron este deporte desde unha idade temperá, e o seu irmán foi clave na curta carreira que leva Irene Noya. O seu pai tamén animouse cando viu o seu potencial. “Aos 5-6 anos medía máis que todos os da miña idade”, recorda. Os seus primeiros pasos estiveron cheos de dúbidas, pero agora considera que “fixen ben en seguir”.
O seu talento levouna á filas do Segle XXI, pero antes diso xa formou parte de concentracións da Selección Galega e da Española U13. Coa primeira xa ten máis camiño rodado e a convocatoria celebrada en Huelva foi, nas súas palabras, “incrible. Non cambiaría por nada esa experiencia”.
Pola súa parte, esta nova convocatoria española é un “orgullo” para a xogadora, que admite que “nunca pensei que chegaría ata aquí e para min é un orgullo que de tantas nenas que xogan ao baloncesto en España escolléranme a min”.
Irene Noya: “Nunca pensei que chegaría ata aquí e para min é un orgullo que de tantas nenas que xogan ao baloncesto en España escolléranme a min”
Sen dúbida, estas convocatorias son pasos importantes na súa carreira. “Creo que se sigo traballando e esforzándome duro pódenme abrir bastantes portas”, declara. Porén, Noya non aparta a vista dos estudos: “Creo que os estudos son algo moi importante. A min encantaríame adicarme profesionalmente ao baloncesto, pero estudando. Intentaría ao máximo compaxinar as dúas cousas por se algunha delas non sae ben, ter ese plan b”, admite.
Irene Noya: “Son moi esixente conmigo mesma, os meus principais obxectivos agora mesmo son estar os 4 anos en Segle e seguir convocada”
Coa súa carrreira aínda comezando, Irene Noya prefire ir paso a paso. “Son moi esixente conmigo mesma, os meus principais obxectivos agora mesmo son estar os 4 anos en Segle e seguir convocada coa Selección nacional e a da miña comunidade. Traballarei moi moi duro e chegado o momento marcareime outros obxectivos”, confesa.
A xogadora é consciente de todo o apoio que tivo para chegar ao punto no que está agora, e por iso ten palabras de agradecemento para “todas as persoas que confiaron en min no mundo do baloncesto, e que probablemente grazas a moitos deles estou onde estou. Grazas ao CLB (Cortegada-Liceo-Bbc), o meu primeiro equipo, e tamén ás Seleccións”.
