Desde este xoves, 10 de xuño, ata o vindeiro día 16, celébrase en Sofía (Bulgaria) os Multi European Games 2021, nos que participan un total de trece deportistas galegas de taekwondo.
Entre a representación galega destacan as competidoras de nivel sénior, con nomes coñecidos como Sara Cortegoso, Alma Pérez, Arlet Ortiz e Tania Castiñeira. Tamén estará na competición a árbitra internacional María Bautista.
En categoría cadete, que abre a competición de taekwondo este mesmo xoves, participarán Ada Hermelo (-33, Hebe), Nadia Bouzas (-37, Kae Sport), Noa Romero (-44, Natural Sport) e Pablo Torrado (-41, Suh Costado). Todos eles realizaron o mércores a súa pesada, e competirán este xoves, agás Noa, que o fará o venres. Para estes deportistas está en xogo a clasificación para o Campionato de Europa Cadete, xa que os dous primeiros clasificados terán un posto seguro na competición continental.
En júnior a presenza galega tamén será ampla. Competirán nesta categoría nas probas femininas María Ferreiro (-49, Couto), Yadira Reimúndez (-55, Mat’s), Irene Montemuíño (-63, Natural Sport), Cloe Iglesias (-63, Patiño), Ainoha García (-68, Couto) e Nuria Cernadas (+68, Natural Sport).
Neste nivel, as dúas primeiras clasificadas estarán no Europeo de pesos olímpicos da categoría e, se son deportistas nadas no ano 2004, tamén lograrán unha praza para o Europeo sub21.
Finalmente, na categoría sénior deste torneo de taekwondo, a Federación Española viaxa a Sofía con catro galegas no seu equipo: Sara Cortegoso (-46, Mace Sport), Alma Pérez (-53, Suh Sport), Arlet Ortiz (-57, Mat’s) e Tania Castiñeira (+73, Hebe).
