Alma Pérez, taekwondista do equipo Suh Sport que compite en -53 quilogramos, quedou a só un paso das medallas no seu primeiro Campionato de Europa sénior. A competición estase a disputar estes días na cidade de Sofía en Bulgaria.
Segundo informa a Federación Galega de Taekwondo, a deportista galega, que ten tan só 19 anos, foi quen de superar dúas roldas de forma rotunda. Pero logo Alma Pérez caeu na disputa dos cuartos de final, non sen antes ofrecer unha grande actuación e asinar un magnífico torneo.
A deportista do Suh Sport, Alma Pérez, comezou a competición en -53 kg contra a finesa Jenna Ylonen, á que a nosa taekwondista non lle deu a máis mínima oportunidade hae (12-0). Unha hora e media despois, pelexou contra a alemá Julia Ronken e repetiu triunfo rotundo, nesta ocasión por 11-0.
Así, Alma Pérez logrou plantarse nos cuartos de final do Europeo, onde lle esperaba un combate contra da deportista húngara Luca Patakfalvy. Trátase dunha taekwondista moito máis experimentada a nivel internacional con medallas en diferentes Open e participación en Campionatos Europeos, así como en Campionatos do Mundo.
Alma Pérez sobre a súa rival en cuartos: “Era moi forte e agresiva, apenas puiden puntuar”
A galega estaba a só un paso das semifinais e por tanto das medallas. Houbo moitas horas de espera e finalmente a deportista galega caeu derrotada contra a representante húngara, unha moi boa competidora. “Era unha deportista moi forte e moi agresiva e apenas puiden puntuar”, explica a galega Alma Pérez, quen, pese a todo está encantado co traballo feito.
Consultada pola Federación Galega de Taekwondo sobre as súas as impresións ao remate da competición, Alma declaraba estar: “Bastante contenta polo resultado, a verdade. Tocoume un moi bo sorteo e conseguín pasar dous combates nun campionato desta magnitude, así que marcho con bo sabor de boca a pesar de quedarme a un paso da medalla contra unha deportista moi forte”.
Sara Cortegoso, caeu na primeira rolda
Pola súa banda, a tamén galega Sara Cortegoso, que pertencente á disciplina do Mace Sport, perdeu en primeira rolda neste Campionato de Europa sénior. A taekwondista Sara Cortegoso competía na categoría de -46 kg.
A rival que a eliminou foi a rusa Larisa Medvedeva, quen fora campioa de Europa sub 21 no ano 2019, entre outros magníficos resultados, polo que non se trataba dunha rival asequible. Con todo, a loita estivo moi axustada ata os instantes finais, nos que a rusa logrou escaparse (16-10).
Sara Cortegoso recoñece que non tivo boas sensacións e non estaba moi satisfeita, aínda que xa pensa en seguir adestrando e corrixindo os errores cometidos.
Agora, da expedición galega, so falta por participar Iván García, que pechará o Europeo o día 11 de abril. O taekwondista galego chega a esta cita continental nun magnífico momento de forma, despois dos Open de Sofía e Turquía, nos que sumou unha prata e un ouro, e vencendo a magníficos rivais.
