O pavillón polideportivo municipal A Fieiteira no concello de Riveira, acollerá mañá sábado e o domingo 1 de marzo o Open de Riveira de Técnica de Taekwondo. Agárdase a chegada de medio milleiro de deportistas. Trátase do primeiro torneo que se celebra en Galicia que puntúa para o ranking nacional e o Mundial de Dinamarca.
No torneo participarán un total de 500 deportistas chegados de toda Galicia e do resto de España. Entre as zonas que terán representación están Madrid, Andalucía, Castilla y León ou Alicante.
A competición comezará ás 9 horas e desenvolverase en sesións de mañá e tarde (de 9 a 14:30 e de 16 a 20:00 horas). Habilitaranse cinco áreas de competición e poderemos gozar do mellor taekwondo desta modalidade.
O torneo celebrarase nas categorías infantil (do ránking galego) e adulto (ránking nacional). Ademais, na categoría adulto tamén se celebrará a modalidade de freestyle. A entrada para seguir esta competición é de balde.
