Táboas no Dépor ABANCA - CE Europa (1-1)

As veces o fútbol é inxusto e pese a que un equipo controle o xogo e xere ocasións, o seu rival é máis efectivo e consegue maior rédito das poucas chegas que ten. Iso exactamente aconteceu no partido que Dépor ABANCA e CE Europa xogaron esta tarde no Estadio ABANCA – RIAZOR e que rematou cun resultado de 1-1.

Depor ABANCA vs CE Europa / MARCOS RODRÍGUEZ

A maior posesión e ocasións xeradas polo equipo coruñés non abondaron para levar os tres puntos ao peto e poñer máis distancia co RCD Espanyol de Barcelona. Catro son os puntos que agora mesmo separan ás galegas, segundas, das pericas, terceiras. En xogo, nove puntos.

As Nosas tocan o ascenso coa punta dos dedos pero aínda non poden agarralo con forza e amarralo. As presas agroman e iso é xusto o que non interesa aun equipo que depende de si mesmo. É tempo de calma e de serenidade para que esa meta non se volva escapar na recta final da Liga.

Dépor ABANCA e CE Europa chegaban á xornada 23 con situacións moi diferentes na táboa. As galegas eran segundas e as catalás eran penúltimas. O alto e a cola da táboa, fronte a fronte.

Ringleiras de deportivistas ateigaban a contorna do Estadio ABANCA-Riazor para poder acudir a ver As Nosas no templo deportivista. Moita da afección chegou minutos antes do partido e as colas nos accesos fixeron que se perderan os primeiros minutos de xogo. No reconto final 7.527 persoas acudiron para ver o partido.

O Dépor ABANCA saíu a por todas desde os primeiros compases do encontro. Con chegadas desde a banda dereita e pisando área. Aos sete minutos de xogo a redonda paseábase pola área chica do CE Europa e chegaba aos pés de varias deportivistas sen que ningunha delas conseguise o que parecía máis sinxelo, empurrala e intentar bater á cancerbeira visitante.

Volveu pasar contra o minuto once. A pelota paseábase na área pequena sen que ninguén rematase, pero Ainhoa Marín recolleu a pelota contra á dereita do ataque deportivista e serviu para Millene que buscou até que atopou o oco para o disparo. O seu tiro foise alto.

Minutos despois a capitá, Cris Martínez, canea na área á procura de achegarse máis á meta rival pero a cobertura da defensa fai que finalmente o esférico marche por liña de fondo. Saque de porta para o CE Europa.

Notábase certa inquedanza e presas. O que menos precisa este equipo. Na banda Irene Ferreras insistía nunha palabra: “paciencia”.

Irene Ferreras, adestradora do Dépor ABANCA / MARCOS RODRÍGUEZ VELO

No 23 outra vez tentouno Millene e fóselle alto o balón. E tres minutos despois, unha vez máis, incisiva desde a banda dereita, Ainhoa Marín colga un balón con perigo á área que obriga á gardameta visitante a estirarse e desviar a traxectoria.

Preto do minuto 30 Lucía enviou por encima do traveseiro o tiro con maior perigo do partido ata o momento. Antes Millene tivo tamén unha ocasión.

O control do xogo, do balón e do partido era deportivista. Salvo en contadas ocasións nin se chegaba a pisar o medio campo branquiazul. Pero, con todo, as xogadoras do Dépor ABANCA se amosaban con dúbidas á hora de tirar a porta.

Ainhoa Marín forzaba un saque desde o curruncho que xera unha nova ocasión para as deportivistas. Outra vez córner. Lucía bota o balón desde a esquina e o remate de Raquel García, que ía entre os tres paus, foi a mellor ocasión do partido até ese momento. Rexeita a córner e o seguinte saque, novamente constituíu unha clara ocasión para o Dépor ABANCA. Moita chegada pero o gol non chegaba e as futbolistas locais empezaban a impacientarse.

Rozando o descanso unha vez máis o perigo chegaba nas botas de Ainhoa Marín que chegaba conducindo o esférico ata diante da porteira acompañada de dúas defensoras e, aínda así, conseguía un disparo. Infructuoso, pero un novo intento de perforar a meta rival que chegaba da xogadora máis vertical do equipo coruñés.

O Dépor ABANCA non conseguíu marcar no primeiro tempo

Ao descanso chegouse co 0-0 inicial no marcador electrónico. Cun minuto consumido da segunda metade chegou o primeiro disparo do CE Europa, un tiro cruzado raso que saíu lambendo o pau da meta defendida por Yohana. Por se alguén pensaba que o conxunto catalán viña a Riazor como espectador, velaí o aviso.

Quedaban 45 minutos por diante e todo por decidir no Estadio ABANCA-Riazor. Corría o minuto 54 cando Ana de Teresa (ADT) remata bombeado un balón que acaba nas mans de Janet, a cancerbeira visitante

Un minuto despois Ainhoa Marín recupera un balón froito da presión ao rival, serve para Millene que lle devolve o esférico pero Marín esvara en non é quen de rematar o que podería ser un merecidísimo gol para á deportivista que levaba xerando ocasións chegada tras chegada.

No minuto 59 de partido, Lucía Rivas entraba no terreo de xogo no sitio de Millene. Ao pouco volvía ter outra chegada con perigo o CE Europa que chegou pouco, pero ben. A efectividade podería definir o paso das futbolistas catalás por A Coruña.

No primeiro balón que tocou Lucía Rivas, nunha chegada pola banda esquerda, a deportivista propiciaría un córner. Un máis na lista das branquiazuis que aínda así non conseguían o premio do gol.

O gol de Ainhoa Marín

E por fin Ainhoa Marín conseguía o premio a tanto esforzo asinando o 1-0 nunha xogada que parecía gafada xa que xa levaba varios intentos fallidos pero que, finalmente rematou en gol. O reloxo marcaba o minuto 67.

A partir de aí o Dépor ABANCA intentouno aínda máis buscando facer sangue do golpe recibido polo CE Europa co gol. E rozou o tanto ata en 2 ocacións nos 5 minuto seguintes. Pero como no resto do partido o tanto non acababa de chegar.

Dez minutos despois de anotar o gol, no 76 de partido, Ainhoa Marín saía do terreo de xogo deixando o seu lugar a Samara.

No minuto 82 o CE Europa empataba o partido cun tiro de María González Ponts raso pegado á cepa do poste da portaría defendida por Yohana. As chegadas das catalás producíronse principalmente na segunda metade, foron poucas pero boas. A efectividade, enorme.

Seguiuno intentando o Dépor ABANCA. Inés Altamira mandaba co tempo case cumprido un obús cunha volea pero a gardameta visitante volveu chafar as aspiracións de As Nosas.

No engadido Paula mandou un balón raso cruzado que tamén levaba marchamo de gol pero outra vez, non foi.

Así, un choque que ben puidera ter acabado en goleada a prol do Dépor ABANCA, remataba en táboas 1-1. As galegas houberan podido tirar partido do 0-0 do RCD Espanyol e poñer máis terra de por medio coas pericas, pero non tocaba. Toca sufrir. Toca respirar fondo e seguir na loita. Toca calma e toca, como decía Irene Ferreras: Paciencia. A meta, o ascenso, está aí mesmo. Quedan tres partidos. As Nosas van por diante e teñen a oportunidade de volver a elite na súa man. Despaciño, e boa letra.

1 de 11

- +

Depor ABANCA vs CE Europa / MARCOS RODRÍGUEZ VELO

Dépor ABANCA vs CE Europa / MARCOS RODRÍGUEZ VELO