- A Sangriña acolleu onte o primeiro derbi do curso 2023-2024 para o balonmán feminino galego e o resultado foron táboas. Empate a 28 goles entre o Mecalia Atlético Guardés e o Conservas Orbe Rubensa BM Porriño.
A igualdade foi a tónica dominante durante todo o envite entre o Mecalia Atlético Guardés e o Conservas Orbe Rubensa BM Porriño, finalizando cun 28-28 no marcador.
No conxunto local, foi o primeiro encontro con Cristina Cabeza dirixindo ao Mecalia Atlético Guardés desde o banco, e o debut da eslovena Blazka Hauptman e a serbia Sandra Radovic, que non puideran xogar ata o de agora por cuestións burocráticas.
Tanto as xogadoras da adestradora madrileña como as deportistas que adestra Ismael Martínez empezaron o partido moi acertadas, anotando en practicamente todas as posesións. Os dous equipos chegaron ao ecuador do primeiro tempo demostrando equidade en todos os aspectos do xogo. Froito diso foi o 8-8 que o marcador reflectía no minuto 15.
Inmediatamente despois, o derbi rompeu e o Conservas Orbe Rubensa BM Porriño logrou avantaxarse no electrónico. Ata practicamente o final da primeira metade, as visitantes mantiveron unha superioridade de apenas dous goles. A pesar diso, no tramo final, o conxunto miñoto lograría chegar ao descanso cun empate 16-16, grazas en parte a paradas relevantes de Estela Carrera.
A segunda metade do partido comezaría da mesma forma que a primeira. Con todo, o marcador variaría constantemente, e os dous equipos alternarían vitorias momentáneas. Con todo isto, chegouse ao minuto 20 da segunda parte cun novo empate (24-24).
De maneira inversa á primeira parte, foron as visitantes as que lograron adiantarse e ser máis eficaces, chegando ao último minuto de partido con dous goles arriba (26-28).
María Palomo deulle aínda máis emoción do derbi anotando o 27-28 a falta de escasos 30 segundos. Despois dun tempo morto e unha sólida defensa do Mecalia Atlético Guardés, África Sempere (máxima goleadora do encontro con 8 tantos) logrou materializar o empate a falta de 5 segundos, logrando un trepidante empate no primeiro derbi da tempada.
Os parciais do partido cada cinco minutos foron: 4-4, 5-5, 8-8, 9-11, 12-14, 16-16 (descanso) 18-19, 20-21, 22-2, 24-24, 25-27 e 28-28.
