O Pescados Rubén Burela FS empata na súa fase preparatoria, neste emocionante partido de pretemporada ante un rival cun equipo moi esixente, as galegas do Poio Pescamar. As conserveiras reforzáronse con xogadoras como Sandra Buzón e Elena Aragón.
Primeira parte con moi bo xogo por parte das Guerreiras Laranxas. Ofrecían en Vista Alegre un xogo dinámico, fluído e con moitas ocasións de gol, con accións de todo tipo. Chegaron a ter catro disparos ao poste, o primeiro de Dany, seguíndolle Antía, e dous de Cilene, un de penalti.
A pesar de estar a xogar mellor con máis oportunidades, o Poio Pescamar ía ir con vantaxe ao descanso de 0-1 coa súa única chegada que convertería Rocío Gómez no minuto 17 demostrando unha efectividade do 100% que, ao final, é o que conta: os goles.
A segunda parte sería similar á primeira, o CD Burela FS seguía circulando o balón moi rápido, combinando con sincronía e xerando moitas oportunidades, cun equipo visitante que se dedicaba a estar forte en defensa.
Empate do Burela
Non tardarían empatar o partido, xa que no minuto 24 Emilly Marcondes marcaba un golazo rematando unha xogada elaborada polo equipo. A pesar de non ter tantas oportunidades como na primeira metade, o CD Burela FS chegaba con moito perigo, e despois do gol Emilly Marcondes volvería ter outro espectacular disparo ao traveseiro.
A ocasión máis clara para poñerse por diante teríaa Dany no minuto 39, despois dunha xogada individual de Peque que a asistiu de luxo, pero detiña Elena crucialmente. Con isto, finalizaría o partido en táboas, co resultado definitivo de 1-1.
FICHA TÉCNICA
1) PESCADOS RUBÉN BURELA FS: Jozi, Dany, Masha, Antía e Peque – quinteto inicial -. Tamén xogaron: Cilene, Lola Muñoz, Patricia, Emilly e Evelina.
1) POIO PESCAMAR FS: Sandra Buzón, Dupuy, Anna, Luci e Marta – quinteto inicial -. Tamén xogaron: Martita, Laura Uña, Elena Aragón, Irene, Dani Sousa, Rocío Gómez, Andrea Alvite, Agostina e Elena.
GOLES: Min 17 Rocío Gómez 0-1; Min 24 Emilly 1-1.
EQUIPO ARBITRAL: Bello Gómez, Bujía Piñeiro-Varela, Pena Porta. Sancionaron con cartón amarelo a Dupuy.
INCIDENCIAS: Partido amigable entre Burela e Poio dous dos conxuntos galegos que militarán na vindeira tempada na Primeira División da RFEF disputado no pavillón Vista Alegre no Concello de Burela.
