A liga de Primeira División do fútbol sala feminino regresaba a Vista Alegre, despois de máis de dous meses, cunha cita de máxima igualdade na que as Guerreiras Laranxas non conseguiron imprimir a intensidade necesaria fronte ao ritmo lento que favorecía a profundidade do banco visitante.
O Pescados Rubén Burela selaba táboas (2-2) ante o segundo do Grupo B da categoría, o Torreblanca Melilla CF, cunha primeira parte na que custou xerar perigo en ambos os lados, con eficacia tan só en estratexia. Con este resultado as da Mariña se quedan coa primeira praza con dous puntos máis cas súas rivais desta xornada que teñen, ademais, dous partidos máis xogados.
Tras non poder aproveitar dous dobres penaltis e cunha continuación goleadora nas dúas redes, as mariñás non deixaron de tentalo. Así, a pesar da superioridade tras a expulsión de Fernanda e da opción de porteira xogadora local, o tanto da vitoria non puido quedar na Bombonera.
Volveron gozar dun grande inicio as da Mariña, continuando co guión das últimas xornadas, estreando a conta goleadora xa no minuto 3, sentenciando Cami ao segundo pau o saque de banda de Peque. O primeiro perigo do Melilla protagonizouno Bia no 5 nunha rápida triangulación, aínda que non puido controlar o esférico fronte a Jozi.
Tras a estrea con garra de Luísa Mayara na Bomboneira poñendo a proba a Sara Soares, o Torreblanca atopou o empate, tamén en estratexia, cun saque de esquina finalizado por Bia. Con máis de oito minutos da primeira parte o Melilla cargouse de faltas. Con todo, non puideron aproveitar as burelistas para recuperar a iniciativa nos dobres penaltis de Elena Aragón, que se lle foi fóra, e Peque, cun pé prodixioso de Sara Soares.
Mereceron o segundo na recta final as de Julio Delgado, aínda que nin Jane, no 17, nin Bea Mateos, no 19, perforaron a rede, nunha primeira parte que recibiu o tempo de descanso acariñando o pau nunha picada de Ale de Paz.
Reacción do Burela
As Guerreiras Laranxas reaccionaron á perfección fronte á vantaxe visitante en Vista Alegre. En menos dun minuto, tras o tanto de Emilly superando a Cami e Jozi, Peque puxo o 2-2, en xogada individual cun disparo raso pegado ao pau, aproveitando precisamente un erro da 99 visitante.
Non deixou de tentalo o equipo de Julio Delgado e Lucas, con máis posesión e ocasións. De novo, o Pescados Rubén Burela rozou o terceiro en estratexia, cun balón que quedou demasiado frouxo a Dany ao segundo pau. Tras a boa chegada de Bia que resolveu Jozi, as mariñás dispuxeron de superioridade numérica coa segunda amarela de Fernanda, a falta de 4 para o final.
Cami e Luísa Mayara probaron por partida dobre. Jane no 38 sorteou a Sara Soares pero non puido culminar a fazaña. Saltou entón Bea Mateos como porteira xogadora para ir a por a vitoria con 2’17” por diante; tentárono ata o final as laranxas pero a igualada, a segunda da tempada, aferrouse ao luminoso.
Dobre compromiso en Vista Alegre: Alcorcón e Móstoles
As Guerreiras Laranxas, continuando no cumio, terán dobre compromiso a próxima semana en Vista Alegre recuperando a xornadas aprazadas ante Alcorcón (venres 19, 19.30 horas) e Móstoles FS (domingo 21, 13.00 horas).
FICHA TÉCNICA
PESCADOS RUBÉN BURELA FS: Jozi Oliveira, Dany, Peque, Cami e Ale de Paz – quinteto inicial – . Tamén xogaron: Lara Balseiro, Jane, M. Cortés, Bea Mateos, Elena Aragón e Luísa Mayara.
TORREBLANCA MELILLA CF: Sara Soares, Julia, Fernanda, Bia e Emilly – quinteto inicial – . Tamén xogaron: Jacke, Maldonado, Fabi e María Soto.
GOLES: 1-0, minuto 3, Cami; 1-1, minuto 11, Bia; 1-2, minuto 22, Emilly; 2-2,minuto 23, Peque.
ÁRBITROS: Carreira Romero // Martínez Torres. Por Burela amarela para M. Cortés (minuto 7), Luísa Mayara (minuto 27), Cami (minuto 29). Por Melilla amarela a Fabi (minuto 28), Fernanda (minuto 32 e 36)
INCIDENCIAS: Partido correspondente á xornada 18 de Primeira División do fútbol sala feminino da RFEF disputado no pavillón de Vista Alegre de Burela. Antes do inicio do choque gardouse un minuto de silencio inicial polo falecemento de Miquel Jaume Rog, presidente do Palma Futsal.
