Táboas 4-4 entre Burela e Futsi no clásico do futsal español

O Pavillón Municipal Vista Alegre de Burela acolleu o encontro da 25 xornada de Primera Federación de Futsal Feminino entre Pescados Rubén Burela FS – Futsi Atlético Navalcarnero. O clásico do futsalfem español foi un partidazo de pés a cabeza, a bombonera foi un espectáculo na pista e na bancada, cunha afección entregada e un aforo case cheo. O resultado: táboas 4-4.

A primeira parte comezaba costa arriba para o Futsi Atlético Navalcarnero tras o que parecía unha lesión de Lorra na perna esquerda, non podendo continuar o encontro. Desde o club galego desexaban “unha pronta recuperación da xogadora”.

Pescados Rubén Burela FS vs Futsi Atlético Navalcarnero / PRBFS

Continuaba o xogo e tras varias oportunidades de ambos equipos, dúas claras de Dany, unha no minuto 2 que vai ao poste e outra no 3 despois dun contraataque e pase de Emilly chega o primeiro gol do Futsi, cun pase desde a banda a Becha que encaixa o balón na portería do Burela.

Dany, xogadora do Pescados Rubén Burela FS / PRBFS

No minuto 11 chega o 0-2 cun gol de Laura Córdoba despois dun córner. Varias oportunidades de Irene Samper, a primeira no 12 que para Belén e a segunda no 15 cun moi cuestionado balón que parece que entra na portería en dúas ocasións, pero as decisións arbitrais non o dan como válido.

Outra oportunidade de Irene Samper ao pau no mesmo minuto e outro tiro de Antía Pérez no 17 que sae fóra preceden o golazo de Emilly cun tiro directo de falta. O marcador queda 1-2 ata o descanso.

Na segunda parte Becha volve subir o marcador a dous goles de diferenza no minuto 23, 3-1. No minuto 27 Patricia recorta distancias de novo co 3-2 pero segundos despois María Sanz volve poñer o marcador a dous goles, 4-2.

No minuto 33 Irene Samper, que fixo un gran partido, volve recortar co 3-4 e o o 37, Antía Pérez empata o encontro cun gol tras varios pases e rebotes en primeira liña de portería.

Emilly e Dany, xogadoras do Pescados Rubén Burela FS / PRBFS

Julio Delgado, contento co “empeño que puxo o Burela”

Un Julio Delgado que se vai “contentísimo”, pensa que poderían levarse os 3 puntos, móstrase moi satisfeito co empeño que puxo o seu equipo, “en tres veces atopámonos con dous goles por baixo contra Futsi, contra un gran equipo, e nunca se baixaron os brazos, iso di moito deste Burela”. Recoñece varios erros que deben volver traballar e refrescar, pero en liñas xerais quédase co empuxe que mostraron durante os corenta minutos.

Celebración no banco do Pescados Rubén Burela FS / PRBFS

FICHA TÉCNICA

4) PESCADOS RUBÉN BURELA FS: Caridad (P), Dany, Cilene, Peque (C) e Emilly – cinco inicial-. Tamén xogaron: Saki, Jenny, Antía Pérez, Irene Samper, Patricia e Jozi Oliveira (P).

4) ATLÉTICO NAVALCARNERO: Belén (P), Ari, Ame Romero, María Sanz e Lorrana – cinco inicial-. Tamén xogaron: Becha, Leti (C), Irene Córdoba, Lucía, Laura Córdoba, Marta Balbuena (P)

GOLES: Min.7 Becha 0-1; min.11 Laura Córdoba 0-2; min.17 Emilly 1-2; min.23 Becha 1-3; min.27 Patricia 2-3; min.27 María Sanz 4-2; min.33 Irene Samper 3-4; min.37 Antía Pérez 4-4.

EQUIPO ARBITRAL: José Manuel Carreira Romero, Rubén Ferrero Carballal, Andrea de Luis Iglesia, Ander Orbegozo Cantón. Viron cartón amarelo no min.15 Leti, min.18 María Sanz, min.18 Irene Córdoba, min.30 Dany, min.32 Cilene, min.33 Ame Romero, min.37 Laura María Bordero (Fisioterapeuta), min.39 Alberto Arranz (2º adestrador).

INCIDENCIAS: Partido correspondente á xornada 25 da Primera División do fútbol sala feminino da RFEF disputado no Pavillón Municipal Vista Alegre de Burela.