Os soños moitas veces fanse realidade. Susú Cores está a piques de realizar o seu, ser adestradora profesional. Terá que deixar atrás a súa Galicia natal e dar o salto ao outro lado do charco, pero será un peaxe menor para unha galega que xa forma parte da historia do fútbol feminino galego.
Esta tempada estaba adestrando ao Boimorto e convertíuse na primeira muller en dirixir a un equipo galego de Preferente. Agora, collerá unha maleta chea de soños para tomar as rendas do conxunto feminino de Independiente del Valle, Las Dragonas da Primeira División de Ecuador. A galega sentarase no banco dun equipo que ten por obxectivo pelexar polo título e clasificarse para a Copa Libertadores. Todo un reto para Susú e un salto na súa exitosa carreira.
“Son días difíciles, e máis cando levas tanto tempo traballando con este grupo. Non quero estenderme demasiado porque levo unha semana coas emocións a flor de pel. Quero agradecer á Federación pola súa aposta, ao director deportivo Manu Fernández pola súa confianza, ás miñas axudantes e resto de compañeiras e a todas as nenas por acompañarme ata aquí”, dicía a adestradora galega.
Susú Cores, adestradora de Las Dragonas: “Son días difíciles, e máis cando levas tanto tempo traballando con este grupo. Non quero estenderme demasiado porque levo unha semana coas emocións a flor de pel”.
Rumbo a Ecuador pero cos deberes ben feitos
Susú quixo deixar todo ben pechado antes da súa aventura en Ecuador. A ribeirense tivo tempo de deixar ao Boimorto nunha boa situación para lograr o seu obxectivo, a salvación. Tamén cumpriu coa Selección Galega Sub-15, que se meteu na segunda fase de Campionato de España.
Susú Cores déixao todo para cumprir un soño. O seu nome xa forma parte da historia do fútbol feminino en Galicia e agora levará o acento galego alén do charco. A ata hai unhas horas Seleccionadora Galega da categoría Sub 15 Feminina, con anterioridade tamén dirixiu á Sub 12, e adestradora do Boimorto que milita na Preferente Galicia, despediuse este mércores das súas xogadoras antes de afrontar a súa aventura.
“Son sentimentos atopados. Estou triste porque me vou, pero ao mesmo tempo moi contenta porque vou facer algo que sempre quixen. Son as vixentes campioas de liga e considero que é unha experiencia bonita. Son 24 horas de fútbol, algo que eu sempre quixen”, apunta a preparadora ribeirense.
Susú Cores, adestradora de Las Dragonas: “Son sentimentos atopados. Estou triste porque me vou, pero ao mesmo tempo moi contenta porque vou facer algo que sempre quixen”.
Un adeus moi emotivo
O de onte foi un día de emocións no campo da USC, en Santiago de Compostela. Foi o último adestramento de Susú Cores coa Selección Galega Sub 15, un combinado que en febreiro disputará a segunda fase do Campionato de España en Elda (Alacante). A galega dirixiu a sesión e ao termo da mesma despediuse do seu staff e das súas futbolistas.
Na despedida tamén estivo presente o presidente da RFGF, Rafael Louzán, quen agradeceu a Susú o seu compromiso e dedicación coa Federación, desexou toda a sorte do mundo a Vicky Vázquez (a súa axudante ata a data e que desde onte colle o mando do equipo) e entregou á preparadora galega unha camiseta da Selección Galega co seu nome ás costas.
As sorpresas non acabarían aí, posto que as xogadoras tamén sorprenderon a Susú cunha montaxe fotográfica que lembrou o seu paso pola Selección desde o ano 2015.
De compartir vestiario con Vero Boquete a seleccionadora
A chama do fútbol prendeu na preparadora ribeirense cando tiña 13 anos. Aos 17, Susú Cores (Ribeira, 1985) xa debutaba como adestradora de categorías base e o seu nome xa forma parte da historia do deporte rei galego.
O seu paso polo Xuventú Aguiño como xogadora motivou á ribeirense para formarse como adestradora e preparadora física. Susú Cores saboreou os doces meles do fútbol naquel Xuventú Aguiño que militou en Liga Nacional e no que compartiu vestiario con Vero Boquete. Sempre unida ao céspede, exerceu desde o 2015 como seleccionadora galega feminina, primeiro co equipo Sub 12 e agora co Sub 15. A iso súmalle a súa primeira experiencia cun equipo masculino, o Boimorto de Preferente. Toda unha carreira de moito esforzo e éxitos no que agora está a recoller os froitos do traballo ben feito.
https://twitter.com/futgal/status/1220389047522201600
Carta de despedida de Susú Cores
Nunca me gustaron as despedidas, e esta non será unha delas, senón un ata pronto!
Vivín cinco anos de alegrías, de subidóns, de baixóns… En definitiva, de EMOCIÓNS! E iso é o que me levo dentro e o que me fixo crecer en todos os aspectos da miña vida!
Moi agradecida á Real Federación Galega de Fútbol pola oportunidade, pola confianza, polo apoio, por deixar facer, polo camiño…
Grazas Manu Fernández por seguir confiando!
A todo o corpo técnico, sempre ao voso carón, sempre como unha familia!
E a vós, ás grandísimas xogadoras que levades dentro, grazas por deixarme acompañarvos no camiño e ensinarme tanto. Sei que seguiredes crecendo e estarei encantada de velo. O fútbol non sempre foi xusto e agardo que algún día déavos todo o que merecedes. Sodes unhas auténticas guerreiras. É unha honra ver como loitades e sentides estas cores, sodes exemplo!
Empezo unha nova etapa lonxe, pero sempre estarei preto. Eternamente agradecida.
1..2..3 GALICIA!!!
Susú Cores
