Un caso positivo en COVID-19 detectado no plantel do Magec Tías “Contra la Violencia de Género” obriga a cambiar varios plans da Liga Feminina 2 (LF2). As canarias enfrontábanse durante tres xornadas seguidas a equipos galegos (o Rosalía, o Arxil e o Cortegada), e os dous encontros da décima e undécima xornada xa se suspenderon oficialmente. O pertencente á duodécima xornada finalmente celebrarse segundo o previsto, o próximo sábado, 12 de decembro, ás 17:30 horas.
A noticia do test con resultado positivo fíxose pública na noite do xoves, polo que o servizo de saúde canario procedeu a poñer en corentena a todo o equipo. Ante esta situación, a Federación Española de Baloncesto (FEB) deu a orde de suspender os tres encontros do Magec.
O pasado sábado, 5 de decembro, o Ulla Oil Rosalía recibía ao cadro canario, nun duelo que se prevía vital para ambos conxuntos. As locais queren deixar atrás a última posición, que ocupan as visitantes con catro derrotas consecutivas.
Aprázase o cruce das grancanarias co CB Arxil
Por outra banda, este martes, 8 de decembro, o conxunto do CB Arxil tiña previsto xogar contra o Magec Tías no seu campo, no marco da undécima xornada.
Porén, o sábado, ás 11:00 horas, o club de Lanzarote comunicou que a PCR realizada á xogadora deu negativo. Pero xa era tarde para cambiar de plans. O Arxil xa cancelara a reserva coa axencia de viaxes para os vóos e para o hotel, polo que xa non tiña posibilidad de viaxar ata a illa. Segundo confirman desde o club galego, agora están á espera de chegar a un acordo co Magec Tías.
Pola súa parte, ante o falso positivo do cadro canario, finalmente si se disputará o encontro de LF2 da próxima fin de semana contra a AD Cortegada. O encontro seguirá segundo o previsto, o 12 de decembro no cambo das galegas.
Unha tempada moi inestable na LF2
Este non é o primeiro encontro das xogadora de Maite Méndez nesta atípica tempada de LF2 que se ve suspendido polo coronavirus. Nas xornadas 4 e 5 o CB Arxil non puido disputar os seus duelos contra o Ulla Oil Rosalía no primeiro caso e o Ibaizabal no segundo, por positivos entre as rivais do equipo verde.
O partido contra o Rosalía xa foi recuperado, cun resultado favorable para o cadro pontevedrés. No caso do encontro contra o equipo vasco, aínda non hai data para recuperar a xornada, pero ambos clubs atópanse en negociacións.
No caso das compostelás, tamén se viu aprazado o encontro contra a AD Cortegada pero non por coronavirus. Nese caso, unhas humidades no pavillón do club de Vilagarcía obrigaron a adiar o duelo.
