Con ambos os dous equipos na cancha e dispostos a xogar, o partido entre a AD Cortegada e o Ulla Oil Rosalía tivo que suspenderse. O motivo, segundo explican desde o club local, reside nas “humidades” que había no Fontecarmoa, e que non permitían a disputa do partido. Ao parecer, a raíz das chuvias a condensación cebouse coa pista do pavillón.
Buscouse un emprazamento alternativo para disputar o partido sen risco de lesión para as xogadoras, pero foi imposible. Así que, logo de falar cos adestradores, Rubén Domínguez e Chiqui Barros, os colexiados do encontro, Iván Escariz Torres, e Andrés Esteban Domínguez, decidiron suspender o partido.
Desde o club de Vilagarcía lamentan que as compostelás do Ulla Oil Rosalía tivesen que facer o esforzo desprazamento desde unha cidade “confinada”, así como as probas médicas para disputar o cruce, e que “aos seis minutos de xogo, logo de 9 resvalóns”, o partido tivera que ser suspendido.
Liga Femenina 2 ⛹️♀️ #LF2
AD Cortegada, 9
Ulla Oil Rosalía, 2SUSPENDIDO el partido a falta de 4:05 minutos para el final del primer cuarto❗️
Los árbitros deciden suspender el partido debido a las malas condiciones de la pista por humedad, ya que se encontraba muy condensada. pic.twitter.com/nsGRitf7Il
— Baloncesto FEDESA (@FundacionFEDESA) October 31, 2020
Deste xeito as de Chiqui Barros tiveron que regresar a Santiago sen xogar o seu partido desta fin de semana. Para as da capital galega o calendario vaise complicando xa que teñen xa adiados os partidos con Maristas Coruña e CB Arxil.
Con adiamentos que se suceden xornada tras xornada debido aos positivos por coronavirus COVID-19 que xorden en diferentes clubs, esta suspensión do encontro entre o Cortegada e o Ulla Oil Rosalía supón un novo contratempo para a loxística dunha tempada que está a ser complicada neste aspecto en todas as disciplinas, tamén no baloncesto, e tamén nesta LF2.
Homenaxe a Helena Mariño e Araceli Oubiña
No arranque do choque no Fontecarmoa rendeuse homenaxe a dúas mulleres recentemente finadas, Helena Mariño e Araceli Oubiña. As dúas deportistas e moi queridas. As xogadoras da AD Cortegada portaron unha pancarta que dicía: “Dúas grandes mulleres que deron exemplo. Grazas Helena Mariño. Grazas Araceli Oubiña”.
Ademais da pancarta, gardouse un minuto de silencio en memoria de Helena Mariño e Araceli Oubiña.
GRACIAS @ADCORTEGADA 💙 pic.twitter.com/PQe4YuxYnw
— CB Vilagarcia (@CBVilagarcia) October 31, 2020