Esta mañá o conselleiro de Sanidade, Julio García Comesaña, anunciaba que as restricións para frear o avance de contaxios de COVID-19 en Galicia se aumentan no ámbito deportivo. Ata agora as limitacións afectaban principalmente ao deporte non federado, pero logo da última reunión do Comité Clínico da Xunta de Galicia decidiuse que o deporte federado tamén terá que parar no ámbito galego.
A partir das 00:00 horas do xoves 21 de xaneiro suspéndense as competicións de ámbito autonómico para o deporte federado. Esta limitación non afecta a deportistas e equipos que compitan en ámbito estatal, como podería ser en baloncesto a Liga Endesa, LF2, en fútbol a Liga Iberdrola ou a Reto Iberdrola, en fútbol sala a Primeira División, en balonmán a Liga Guerreras ou Liga Ibedrola de Voleibol da RFEVB, por citar algúns exemplos. Tampoco afectaría a deportistas individuais que acudan a competicións de ámbito superior ao autonómico.
Adestramentos do deporte non federado suspendido
No que atinxe aos adestramentos, as deportistas federadas deberán respectar as mesmas restricións que as non federadas. Por exemplo, poderán adestrar de xeito individual pero en grupo non poderán facelo máis de catro persoas convivintes. Tampouco poderán superar os límites perimetrais que se apliquen aos seus municipios ou eludir o toque de queda fixado para as 22:00 horas neste momento.
O fin desta limitación no se especificou polo que se infire que virá determinado pola evolución da pandemia na nosa comunidade.
Na súa comunicación a Xunta explicaba que “na xuntanza do comité tamén se tratou o tema do deporte federado. Neste senso, decidiuse suspender toda competición deportiva autonómica, mentres que os adestramentos terán que ser individuais ou como máximo de catro persoas e adaptándose aos peches perimetrais e ao horario do toque de queda. A competición de ámbito estatal si que se mantén”. O detalle destas medidas queda pendente da publicación no Diario Oficial de Galicia da orde que o recolla.
Na súa comparecencia, o conselleiro de Sanidade, Julio García Comesaña, definiu a situación actual como “preocupante” e “de claro crecemento”. Aínda así, mostrou a súa confianza en que as medidas adoptadas comecen a dar resultados, incidindo en que hai xa experiencias previas que demostran que si funcionan.
Segundo informaba a Federación Galega de Atletismo, a Xunta de Galicia convocou hoxe, marates 19 de xaneiro de 2021, “con carácter de urxencia e por vía telemática ás federacións para tratar sobre as novas medidas adoptadas polo citado organismo autonómico”.
