A terceira das citas das Series Mundiais de paratríatlon celebrouse esta fin de semana en Montreal (Canadá). Alí a galega Susana Rodríguez Gacio acrecentou aínda máis a súa lenda e sumou un novo título ao seu palmarés na categoría PTVI xunto coa súa guía Sara Pérez.
Ver esta publicación en Instagram
Hai dous meses que Susana Rodríguez Gacio pasaba por quirófano para poñerlle remedio a unha lesión de xeonllo que non lle deixaba adestrar ben. Foi o 10 de abril. Estamos a 28 de xuño, xa disputou dúas probas internacionais e venceu nas dúas. Imparable incluso cando aínda non está totalmente recuperada. Ela mesma o declaraba antes da proba de Montreal nas súas conta de Instagram.
Ver esta publicación en Instagram
Primeiro foi o seu sétimo campeonato de Europa de paratríatlon celebrado en Tarragona. Hoxe, xunto á súa guía Sara Pérez, Susana Rodríguez Gacio vencía nas Series Mundiais de Montreal.
Ver esta publicación en Instagram
A triatleta viguesa volve amosar que a súa tenacidade e esforzo fan que o seu corpo non sexa quen de poñerlle límites ao seu palmarés.
Susana Rodríguez cruza a meta con máis de 2 minutos de ventaxa
Para completar a natación, bicicleta e carreira, Susana Rodríguez Gacio e Sara Pérez empregaron un tempo de 01:03:48. Por detrás, na liña de meta, entrarían cun tempo de 01:05:51 a xermana Anja Renner e a súa atleta de apoio Maria Paulig. As españolas superaron ás segundas en máis de dous minutos. O terceiro posto foi para a triatleta estadounidense McClain Hermes.
Para o tramo de natación, Susana Rodríguez Gacio e Sara Pérez invertiron 11:26 saíndo primeiras da auga. Sobre a bici pedalearon 30:01 e no tramo de carreira empregaron 20:17 cruzando a meta en primeiro lugar e levando a cinta co seu peito e os brazos en alto.
