Contra as 1:31 da madrugada (hora galega) a deportista Susana Rodríguez Gacio empezará a súa competición nunha das probas máis duras dos Xogos Paralímpicos: o tríatlon. Será no Odaiba Marine Park de Toquio.
Non son os primeiros Xogos Paralímpicos para a viguesa, pero di que acude a eles “coas mesmas ganas e ilusión ou aínda máis”.
En Río 2016 apuntou maneiras e trouxo para casa un diploma paralímpico, pero en Tokyo 2020 chega cunha preparación enorme, moita máis traxectoria internacional, e un curriculum deportivo envidiable. Así que desta volta o seu obxectivo xa está nos metais, unha meta máis que factible se a sorte acompaña á galega e as condicións climáticas da cidade nipona (con altas temperaturas e moita humidade), non lle xogan unha mala pasada.
So por poñer algúns exemplos Susana Rodríguez Gacio fíxose con todos estos méritos neste ciclo olímpico que a colocan como unha das favoritas da proba.
- Campioa na Copa do Mundo de paratriatlón PTVI (2021)
- Ouro no Europeo de paratriatlón PTVI (2019)
- Ouro no Mundial de paratriatlón PTVI (2018)
Debido a súa discapacidade visual, froito do seu albinismo, a deportista galega compite xunto a unha guía coa que fai equipo. Nesta modalidade de tríatlon, en Toquio será os seus ollos Sara Loehr.
Así é a proba de tríatlon PTVI
Primeiro tocarán os 750m de natación, logo a transición e subirse á bice para afrontar os 20km de ciclismo dando catro voltas ao percorrido que non é chairo de todo e que mide 5km. Finalmente unha nova transición, baixar do tamdem e apretar ao máximo neses últimos 5km de carreira que se desarrollarán nun percorrido de 1,25 km ao que as participantes darán catro voltas.
O tríatlon é unha modalidade para deportistas con moito fondo físico, fortaleza mental e constancia. Susana Rodríguez demostrou xa nos Xogos Paralímpicos de Río e coa súa traxectoria posterior, que é unha gran competidora nesta disciplina.
No post que publicaba desde o aeropuerto antes de “despegar cara un sono”, como ela mesma dicía, a viguesa posaba xunto ao núcleo duro do seu equipo: o seu entrenador Luis Alberto Pina Refojos, co que leva anos preparándose, e os seus deportistas de apoio (guías), Sara Loehr no caso do tríatlon e o tamén galego Celso Comesaña para os 1.500 m de atletismo para os que tamén está clasificada. Si, como seguramente estarán pensando, esta galega non deixa de se pór novos retos.
Ver esta publicación en Instagram
Susana Rodríguez Gacio podería correr tamén os 1.500m
Se todo vai ben logo da competición desta noite, e o domingo ten forzas abondo, Susana Rodríguez Gacio ten en mente tomar a saída nesa proba de media distancia e facer historia sendo a primeira muller española que participa en dúas modalidades deportivas nuns mesmos Xogos Paralímpicos.
Competiría no Tríatlon PTVI feminino e correría a distancia de 1.500 m en atletismo para a categoría T11, onde foi cuarta no Mundial de Dubai e segunda no Europeo de Polonia. Así que te o seu sitio máis que merecido. Queda ver se as forzas aguantan tan seguido.
As series clasificatorias para os 1.500m se disputan a partir das 2:39 da madrugada do domingo no Estadio Olímpico. A final é o luns 30 ás 2:38. Así que si, para ver en vivo a Susana Rodríguez Gacio, estes Xogos toca trasnoitar.
E ademais, doutora
Fóra das pistas, Susana Rodríguez é doutora en medicina. Primeiro estudiou fisioterapia e logo preparouse como doutora. Durante a pandemia estivo exercendo en primeira liña. A súa sona levouna incluso a ser portada da prestixiosa revista Time, aí é nada!
