Volveuno facer. Susana Rodríguez Gacio repite no máis alto do podio. A paratriatleta galega vén de proclamarse campioa do mundo de Triatlón en Abu Dabi (Emiratos Árabes Unidos). É a cuarta vez que a deportista galega se fai co ouro nun Mundial. Ao seu lado estivo nesta ocasión Sara Loehr como deportista de apoio, guía.
Xuntas, Susana Rodríguez e Sara Loehr repetiron o éxito dos Xogos Paralímpicos de Tokyo e subiron ao máis alto do caixón na categoría PTVI feminina. Nesta ocasión non mandaron na proba desde o inicio, como aconteceu en Xapón. Se alí foron as mellores en todas as disciplinas (natación, ciclismo e carreira), en Abu Dabi a súa actuación foi de menos a máis.
Remontada de Susana Rodríguez na bici e remate na carreira
A paratriatleta e a súa guía saíron da auga en quinta posición e tiveron que remontar logo dese inicio na natación. Sobre a bici remontaron postos e puxéronse á fronte dos tandem.
Na carreira a pé, onde son máis fortes Susana Rodríguez Gacio e Sara Loehr, o camiño ao éxito e ao ouro foi máis doado. Dominaron a competición atlética e cruzaron a meta en primeiro lugar parando o cronómetro en 1:06:26.
Qué esto es un Campeonato del Mundo 🌍! 🥇 y van 4 🌈, esta vez acompañada de @saralm33 😃♥️💪🏻 A disfrutar y empezar a construir para el año que viene! pic.twitter.com/IiOYuE9inD
— Susana Rguez. Gacio (@SuRGAcio) November 5, 2021
O segundo lugar foi para a italiana Anna Barbaro (1:09:25) e o bronce para a británica Alison Peasgood que fixo o recorrido nun tempo de 1:09:40.
España conseguía tamén o ouro na categoría PTS3 na que Andrea Miguélez foi a mellor neste mundial de Abu Dabi. Segundo informa a Federación Española de Triatlón, lograron medallas de prata Marta Francés, en PTS4; Héctor Catalá, con Ángel Salamanca como guía, en PTVI; Dani Molina en PTS3; e Lionel Morales, en PTS2. E tamén subiron ao podio para recoller medallas de bronce mundiais: Eva Moral en PTWC e Alejandro Sánchez Palomero en PTS4.
