A pivote surafricana Suné Swart poderá gozar a próxima tempada de xogar na Liga Endesa, xa que chegou a un acordo para continuar defendendo a elástica do BAXI Ferrol, segundo informa o club. Deste xeito, a deportista cumprirá a súa terceira tempada no conxunto departamental.
A xogadora recibiu varias ofertas, pero non dubidou en seguir ás ordes de Lino López, que lle dá a posibilidade de debutar na máxima categoría do baloncesto español, esperando axudar ao equipo a conseguir o obxectivo da permanencia.
Suné Swart tiña moi claras as súas preferencias e comenta sobre a súa continuidade no equipo que “decidín quedarme no BAXI Ferrol porque gocei os últimos dous anos cun club cheo de persoas que se preocupan polos demais como seres humanos primeiro, logo como profesionais. Antes de vir a Ferrol, escoitei que era un ‘club familiar’ e durante as dúas últimas tempadas demostráronmo. Os compañeiros, os adestradores, o club e a afección son persoas que me motivan a traballar duro e dar o mellor de min”.
Suné Swart, xogadora do Universitario Ferrol: “no BAXI Ferrol porque gocei os últimos dous anos cun club cheo de persoas que se preocupan polos demais como seres humanos primeiro, logo como profesionais. Antes de vir a Ferrol, escoitei que era un ‘club familiar’ e durante as dúas últimas tempadas demostráronmo”
A pivote surafricana tamén destaca que “da nova tempada espero que traballemos aínda máis duro que antes e gozar aínda máis do que fixemos. Teremos momentos difíciles que nos desafiarán, como en calquera outra tempada, pero manterémonos xuntas, gozaremos da viaxe e sairemos máis fortes”.
Suné Swart: “Quero dárllelas grazas á afección por pasar por todo”
A xogadora tamén manda unha mensaxe aos afeccionados do cadro departamental e sinala que “aos fans gustaríame darlles as grazas. Pasaron por todo o bo e o malo. Mesmo cando non se lles permitiu asistir aos partidos, sentimos o seu apoio. Son unha gran parte do noso éxito e terán un gran impacto na próxima tempada”.
Desta forma, Suné Swart convértese na cuarta xogadora confirmada polo BAXI Ferrol para a próxima tempada, tras as renovacións das súas compañeiras Jenna Allen, Natalia Rodríguez e Patri Cabrera.
