O Dépor ABANCA inicia un duro tramo competitivo co Real Madrid como primeiro reto, e tras unha dolorosa derrota ante o Logroño, rival directo para evitar o descenso.
Para afrontar este tourmalet, a porteira branquiazul Esther Sullastres asegura que o equipo “cambiou o chip e estamos noutra dinámica”. Seguindo a filosofía de “borrón e conta nova”, as deportivistas están preparadas para facelo ben e “con ganas de resetear e afrontar o partido como o que é, un partido para disputar os puntos”.
Un rival con caras coñecidas
Para o encontro deste sábado, ante o Real Madrid, a gardameta catalá sinala que a clave para competir estará na solidez defensiva, “algo que faltou no partido anterior”, pero tamén en “non cometer erros, non asumir riscos “tontos” e ter moita frescura a nivel da creación de xogo e ser efectivas arriba, claro”.
Enfronte do Dépor ABANCA estará un equipo reforzado e con vellas caras coñecidas. Sullastres sinala que para esta tempada, as madrileñas reforzáronse con fichaxes de dentro da Liga Iberdrola, como é a súa excompañeira Tere Abelleira, quen “destacou e fixo unha gran campaña o ano pasado”. Sobre ela, sinalou que lle gustaría que “estivera con nós, pero me alegro de que lle vaia ben”.
Aínda así, recoñece que todo cambia unha vez pon as botas para competir. “Son rivais e dáme igual se foron compañeiras, o que quero é gañar”, asegurou a gardameta, en relación á visita de Abelleira e Misa.
Sobre o reencontro coa primeira en terras galegas, a porteira declarou que “é unha gran xogadora, e supoño que estará con ganas de vir”. Este partido será a volta de Abelleira a un Abegondo algo distinto, “polo límite de aforo”.
Factor Abegondo e factor público segundo Sullastres
Neste sentido, Sullastres sinalou a importancia que ten a presencia do público na bancada para as branquiazuis. ” Houbo poucas xornadas con público, nas últimas dúas en casa si que houbo e notouse moito. Hai pouca xente e san separados pero están cos tambores, o bombo, cantando, animando e da moito impulso”, recoñece a xogadora.
Sullastres: “Un equipo non son as que xogan e as que non, é todo, é afección, sensacións, é campo, é ambiente e no noso caso nótase moitísimo”
Por iso, a catalá considera que un equipo non está conformado só polas súas futbolistas, senón que é todo o que o rodea: “é afección, sensacións, é campo, é ambiente e no noso caso nótase moitísimo e o ano pasado notábase moito porque sempre estaba a bancada chea”.
Con opcións de saír do descenso
Atendendo á clasificación, coa salvación a catro puntos de distancia estando aínda en xogo 30, Sullastres móstrase confiada e optimista.
Recoñece que a derrota na pasada xornada do Dépor ABANCA ante o EDF Logroño foi un “mazazo”, tanto polo resultado por como se xestou. Por iso, o luns viuse “a un equipo tocado”, pero para o mércores o conxunto xa “cambiou de chip”.
Agora miran ao duelo co Real Madrid como un “partido diferente, hai que xogar de forma diferente e asumir menos riscos”. Sullastres asegura que o equipo está con ganas e ve “factible” a salvación.
No equipo coruñés non existe unha meta de conseguir un número determinado de puntos, e as branquiazuis non están amedrentadas ante os próximos rivais. “O Real Madrid deixouse puntos, veñen de perder contra o Levante, cun bo plantexamento de partido, o Atleti á vista está que esta perdendo quizais de máis e son momentos que hai que aproveitar”, subliña Sullastres.
Sullastres: “Entendemos que temos que gañar os duelos directos e rascar algún punto máis”
Tamén asegura que prefire non atender moito á clasifiación e prefire seguir “partido a partido”. Nas súas palabras, “entendemos que temos que gañar os duelos directos e rascar algún punto máis. Con tres non saímos do descenso, pero estamos a catro. Non o veo moi difícil, factible é”.
Isto supón un estímulo para o Dépor ABANCA, xa que “pese a ter empezado mal a liga, coa racha de oito derrotas, e pese a ter perdido partidos importantes, como contra o Betis en casa, ao final os números son o que son”. Catro puntos, ou dous bos partidos, e as branquiazuis estarán probablemente fóra do descenso, con encontros aínda pendentes con rivais directos.
“Por que non? Demostrouse nesta Liga que as de abaixo poden gañar ás de arriba. Nós estamos aí intentándoo e o primeiro partido é esta fin de semana”, conclúe de maneira positiva.