O Dépor ABANCA segue vivo e coleando na Primera Iberdrola, coa permanencia a catro puntos de distancia. Os ánimos no vestiario branquiazul están polo alto tras o costoso empate ante o Atlético de Madrid, e o plantel vése capaz de lograr a xesta da salvación. A gardameta Esther Sullastres asegura que “cremos no que facemos, no noso xogo e no noso sistema”.
Na presente tempada, as coruñesas non están a actuar como un rival forte se xogan como visitantes. Só foron quen de puntuar en catro ocasións, sendo a última o 1-1 ante as colchoneras. Un punto que non serve para achegarse ao obxectivo de salvar a categoría, pero que “obviamente reforza”. Máis aínda tendo en conta o nivel do rival.
Con todo, o Dépor ABANCA xa non atende aos escudos dos seus contrincantes “só queremos gañar e iso dános igual”, apunta a gardamallas.
O vestiario do Dépor ABANCA está motivado
As xogadoras de Manu Sánchez atopáronse no Wanda a un equipo madrileño que non está a pasar polo seu mellor momento da tempada. Malia isto, e rematar o partido en táboas, Sullastres considera que “rascar un punto ao campo do Atleti é un fito importante”.
As branquiazuis van avanzando na dirección correcta, polo que a porteira recalca que “temos que seguir nesta dinámica”. Un solitario punto nun momento de necesidade máxima non é suficiente, pero a xogadora prefiere quedarse co “gran traballo” do equipo galego. “Hai que seguir porque estamos moi contentas co resultado e a por todas contra o Sporting“, engade.
O partido do mércores serviu como unha motivación extra, pero tamén supón un desgaste engadido. Sullastres admite que varias xogadoras están tendo unha carga bastante alta, pero “agora xestiónanse ben estes días. Estamos xa “acostumadas” a xogar entre semana. Confiamos no sistema e imos a morte a por elo”.
Un equipo distinto ao da primeira volta
No encontro disputado en terras madrileñas puidose ver un enfrontamento ben distinto ao da primeira volta. No partido xogado en Riazor, as colchoneras venceron por un 1-8, e unha volta despois as branquiazuis foron quen de tratar de ti a ti ao Atlético de Madrid.
Para Esther Sullastres, a clave está en que o Dépor ABANCA xa non toma tantos riscos atrás. “É unha cousa que viñamos facendo na primeira volta. Estabamos intentando sacar o balón desde atrás xogado con presión alta do rival e creo que perdemos moitos balóns así. Xa nos primeiros vinte minutos estabas por debaixo do marcador”, recorda.
Esther Sullastres: “Agora tomamos os menos riscos posibles e intentamos que se disputen os balóns no medio do campo para que cheguen ás dianteiras canto antes mellor”
Este sistema de xogo pode ser vistoso para o público, pero a catalá sinala que “non temos xogadoras para facelo nin o tempo necesario para adaptar ás novas a este xogo”. Por iso, agora “tomamos os menos riscos posibles e intentamos que se disputen os balóns no medio do campo para que cheguen ás dianteiras canto antes mellor. Parece que está a funcionar”.
Outro punto fraco das deportivistas está nos goles a balón parado. A futbolista subliña que “é unha das razóns polas que estamos abaixo”. Por este motivo, explica que nos adestramentos inciden neste tipo de xogadas: “Aínda que non se note, porque encaixamos un máis, realmente estamos incidindo, adestrando como defender córneres e faltas laterais”.
Como porteira, Sullastres está “pendente do tiro, xa que hai dúas xogadoras, tampouco podo estar máis fóra, é un balón que remátase na área pequena, pero teño que estar pendente do tiro”.
Cunha xogada a balón parado chegou o gol do Atlético de Madrid o pasado mércores: “Creo foi unha sucesión de fallos, tanto resbalón de Eva, como a marca de Iris como a non saída miña. Hai que ser conscientes de que cada gol pesa moitísimo e, como sexa, pero temos que defendelo mellor”.
Sullastres e as branquiazuis céntranse só nos seus partidos
A Primera Iberdrola está xa na súa fase final, co descenso aínda por decidir. As branquiazuis ven a salvación “factible”, principalmente atendendo ao Rayo. As vallecanas, que marcan a zona de descenso, teñen por diante “partidos difíciles”.
Esther Sullastres: “Se gaña o Betis é bo para nós, pero se non gañamos non vale de nada”
Esta mesma fin de semana as madrileñas xogarán contra as andaluzas do Betis, nun encontro que pode determinar o futuro do Dépor ABANCA. Porén, isto non preocupa demasiado ás coruñesas, xa que “se gaña o Betis é bo para nós, pero se non gañamos non vale de nada. Primeiro é gañar e logo estar pendentes”, apunta a 1 do club herculino.
O “compoñente emocional” supera ás complicacións físicas
Para sobrepoñerse a unha tempada esixente, as futbolistas dirixidas por Manu Sánchez guíanse polo sentimento antes que polo corpo. “Hai un compoñente emocional que supera ao físico, que é que todas desexamos estar en Primeira co Dépor e salvarnos”, explica Sullastres.
Esther Sullastres: ” Hai xogadoras que xogan tocadas. Aquí cada unha aporta o seu gran de area para sumar”
“Cando o desexo é tan grande a xente fai un esforzo, hai xogadoras que xogan tocadas. Aquí cada unha aporta o seu gran de area para sumar”, engade.
E non está a ser nada doado. Este é un curso “difícil” e “raro” en palabras da porteira. Por un lado, a pandemia condicionou o ambiente normal nos partidos, cun Abegondo baleiro e unha chea de restricións.
No ámbito deportivo, os resultados non acompañaban. “Ves que as cousas non saen. Reforza a teoría de que o fútbol é un estado de ánimo. Estivemos abaixo desde o inicio de tempada e agora vémonos con posibilidades de saír”, sinala máis optimista.
Esther Sullastres: “Sentir esa confianza faime tomar mellores decisións, non estar pendente dos fallos e nese sentido estou moi contenta”
A nivel persoal a sorte e o éxito sorríen máis a Sullastres. Nos últimos partidos é unha peza fundamental do debuxo de Manu Sánchez, algo que a futbolista considera que “é o que todo xogador quere, xogalo todo. Adestro para isto e a tranquilidade que aporta a continuidade, sobre todo nun posto como a portería é moito máis importante que calquera tipo de preparación. Sentir esa confianza faime tomar mellores decisións, non estar pendente dos fallos e nese sentido estou moi contenta”.
Seguinte rival: o Sporting de Huelva
O seguinte rival a bater será o Sporting de Huelva, un equipo que ten “un xogo directo” nun “campo moi pequeno e artificial”. A porteira agarda a un equipo forte na casa, pero coa tranquilidade de estar a dez puntos do descenso.
“Hai que aproveitarse do momento e nós imos moi necesitadas e elas teñen un calendario adquirible. Así que hai que aproveitarse deste momento. Hai que ir mentalizadas en facer o noso e xa está”, finaliza.
